6,052 total views
Humingi ng paumanhin si Ruel Ucat kay Archbishop Jose Cabantan at sa mga mananampalataya ng Archdiocese of Cagayan de Oro matapos ang kontrobersiyang pagpapakilala nitong pari kahit walang clerical authority sa alinmang ecclesiastical jurisdiction sa bansa.
Nauna nang nagbabala ang arkidiyosesis laban kay Ucat at hinimok ang publiko na maging mapanuri sa mga nagpapakilalang lingkod ng Simbahan.
Sa panibagong pahayag ng arkidiyosesis, sinabi nitong personal na nakipagpulong si Ucat kay Archbishop Cabantan at nagpahayag ng pagsisisi at hangaring makabalik sa Simbahang Katolika.
“Mr. Ruel Ucat has earnestly sought forgiveness for his past actions and expressed sincere repentance,” ayon sa pahayag.
Ayon pa sa arkidiyosesis, pormal nang tumiwalag si Ucat sa dating denominasyon nito at nais nang ganap na makabalik sa pakikipagkaisa sa Simbahang Katolika bilang isang layko.
“Mr. Ucat has formally resigned from his previous denomination. He now desires to return to the full communion of the Roman Catholic Church as a layperson,” dagdag pa nito.
Sinabi rin ng arkidiyosesis na layunin ni Ucat na muling pagtibayin ang kanyang pananampalataya at katapatan sa mga aral ng Simbahan.
“In doing so, he seeks to renew his faith and reaffirm his commitment to the Church and its teachings.”
Muli namang pinaalalahanan ng Simbahan ang mga mananampalataya na maging mapagmatyag sa mga nagpapanggap na pari o lingkod ng Simbahan at tiyaking beripikado ang clerical status ng mga ito, lalo na sa mga gawaing isinasagawa sa labas ng mga parokya at diyosesis.
