4,494 total views
Itinampok ng Parokya de Nuestra Señora de la Paz y Buen Viaje sa Balara, Quezon City, ang paglalakbay ng pamayanan tungo sa pagtatatag ng permanenteng tahanan ng kanilang patrona matapos ang mahigit isang dekadang pananatili sa kasalukuyang dambana.
Ayon kay Fr. Joseph Buslon, kura paroko ng parokya, matagal nang pangarap ng pamayanan na magkaroon ng sariling simbahan upang higit pang mapalawak ang paglilingkod sa komunidad.
“Talagang nararapat na magkaroon ng permanenteng tahanan ang Mahal na Inang Nuestra upang mas makapaglingkod nang mas malawak sa mga nasasakupan,” pahayag ni Fr. Buslon sa Radyo Veritas.
Ibinahagi rin ng pari na kabilang sa pangunahing proyekto ng parokya ang pagbili ng lupa at pagpapatayo ng permanenteng simbahan, pastoral center, at columbarium kasabay ng patuloy na pagpapatupad ng mga programa tulad ng educational assistance, feeding program, at medical missions.
Kaugnay nito, humiling ng panalangin at suporta ang pari para maisakatuparan ang planong pagtatayo ng simbahan sa nasabing komunidad.
“Ang inyong dasal ay malaking bagay na maitutulong para maisakatuparan. Pero higit sa lahat, siyempre ang inyong tulong, lalo na sa pagbibigay ng donasyon, ay napakahalaga sa pagbili ng lupa at pagtatayo ng permanenteng luklukan ng Mahal na Ina, Nuestra Señora de la Paz y Buen Viaje de Balara,” dagdag pa ni Fr. Buslon.
Kinilala rin ni Fr. Buslon ang nagkakaisang komunidad, lalo na ang mga Basic Ecclesial Community (BEC) na aktibo ring katuwang ng parokya sa pagsusulong ng mga programang pampastoral at pang-espirituwal.
Sa kanyang homiliya, inihalintulad naman ni Novaliches Bishop Roberto Gaa ang paglalakbay ng parokya sa isang galyon na naghahanap ng madadaungan habang tangan ang pananampalataya at misyon ng Simbahan.
“Para tayong mga galyon naglalakbay, naghahanap ng madadaungan,” ayon kay Bishop Gaa.
Ipinaliwanag ng obispo na ang debosyon sa Nuestra Señora de la Paz y Buen Viaje ay nagsimula noong panahon ng galleon trade kung saan hinihingi ng mga manlalayag ang proteksyon ng Mahal na Birhen sa kanilang mapanganib na paglalakbay.
“The galleon is also the symbol of spreading the faith or evangelization,” paliwanag ng obispo.
Binigyang-diin din ni Bishop Gaa na tulad ni Maria na nagkalinga kay Hesus, ang Simbahan ngayon ay patuloy ding nagdadala kay Kristo sa gitna ng mga pagsubok ng buhay.
Ibinahagi ng obispo na dumaraan pa sa masusing proseso sa Vatican ang pag-apruba sa planong pagbili ng lupang pagtatayuan ng permanenteng tahanan ng parokya dahil sa malaking halaga nito, ngunit nananatiling positibo ang simbahan sa nalalapit na katuparan nito.
Hinimok naman ni Bishop Gaa ang mga mananampalataya na manatiling nagkakaisa habang sama-samang isinusulong ang pangarap ng parokya.
“Let us be a galleon, a ship, a church journeying together in the same boat, navigating through the different risks in life, but journeying together,” giit ng obispo.
Samantala, tiniyak naman ni Fr. Buslon na bagama’t maliit pa ang kasalukuyang simbahan, patuloy itong nagsisilbing tahanan ng pananampalataya para sa komunidad ng Balara.
“But eventually, doon po kami patungo sa pagkakaroon ng permanenteng lugar at permanenteng tahanan para sa aming Mahal na Ina,” giit ni Fr. Buslon.
Ayon sa kasaysayan, ang debosyon ng Nuestra Señora de la Paz y Buen Viaje de Balara ay nagsimula nang matagpuan ang imahe ng Mahal na Birhen malapit sa isang balon sa lugar, hanggang sa patuloy na lumawak ang debosyon dahil sa maraming himala na iniugnay sa kanya.
Taong 2012 naman nang maitatag ang parokya na itinalaga sa Mahal na Birhen ng Kapayapaan at Mabuting Paglalakbay na bahagi ng Diocese of Novaliches.
