730 total reads
Itinuring ni Tabuk Bishop Sean Mejia na kasalanan laban sa nilikha ng Diyos ang maling pagtatapon ng basura, kasabay ng paglalabas ng pastoral na direktiba na mahigpit na ipatupad ang waste segregation at composting sa mga parokya, paaralan, tanggapan ng Simbahan at sa bawat tahanan sa Kalinga at Apayao.
Binigyang-diin ng obispo na ang pangangalaga sa kalikasan ay hindi lamang usapin ng kalinisan o responsibilidad ng pamahalaan, kundi isang moral at espirituwal na pananagutang bahagi ng pagsasabuhay ng pananampalataya.
“To harm our rivers and choke our oceans with waste is to sin against God’s creation and to compromise the well-being of our neighbors, especially downstream and coastal communities who suffer most from environmental degradation,” bahagi ng pastoral letter ni Bishop Mejia na inilabas noong October 10.
Inatasan ng obispo ang mga institusyon ng bikaryato na mahigpit na ipatupad ang paghihiwalay ng basura at magtayo ng mga compost pit para sa mga nabubulok na materyales.
Kabilang sa mga direktiba ang paggamit ng magkakahiwalay na basurahan para sa biodegradable, recyclable, at residual waste; pagbabawas ng single-use plastics sa mga aktibidad ng Simbahan; at pagbabawal sa pagtatapon ng basura sa mga kanal, bangin, at pampang ng mga ilog.
“This global and local ecological crisis is not merely a secular or civil concern; it is a profound moral and spiritual imperative,” giit ng obispo.
Nanawagan din si Bishop Mejia sa mga lokal na opisyal sa Kalinga at Apayao na mahigpit na ipatupad ang Republic Act No. 9003 o Ecological Solid Waste Management Act at maglaan ng sapat na pasilidad at pondo para sa maayos na pamamahala ng basura sa mga barangay.
Binigyang-pansin din ng obispo ang mga ilog ng Chico at Apayao, na nagsisilbing daluyan ng mga basurang hindi maayos na naihihiwalay at itinatapon sa mas malalaking daluyan ng tubig at sa dagat.
Ayon sa obispo, ang pagprotekta sa mga ilog at pangangalaga sa kalikasan ay mahalagang bahagi ng pagiging tapat na katiwala ng sangnilikha.
“Protecting our living waters and caring for the earth is an integral part of living the Gospel,” aniya.
