28,206 total reads
Binigyang-diin ni Pope Leo XIV na ang Simbahan ay tinatawagan na maging aktibong bahagi ng mundo at makiisa sa mga hamon ng pang-araw-araw na buhay ng bawat isa.
Sa kanyang ulat sa Veritas Pilipinas, ibinahagi ni Rev. Fr. Gregory Ramon Gaston, Rector ng Pontificio Collegio Filipino sa Roma at Vatican Correspondent ng Radio Veritas ang mga pangunahing kaganapan sa Vatican, kabilang ang Wednesday Audience ng Santo Papa kung saan tinalakay ni Pope Leo XIV ang Gaudium et Spes, isa sa mga dokumento ng Second Vatican Council.
Ayon kay Fr. Gaston, binigyang-diin ng Santo Papa na hindi lamang dapat manatili ang Simbahan sa loob ng mga parokya kundi kailangang makiisa sa buhay at mga pangangailangan ng sangkatauhan.
“Sabi ng Second Vatican Council, pinaalala ni Pope Leo na involved ‘yung Simbahan sa buong mundo. Hindi lamang sa sacristy, hindi lamang sa loob ng Simbahan, ‘no, kundi sa labas.” Bahagi ng pahayag ni Fr. Gaston sa Radyo Veritas.
Ipinaliwanag ni Fr. Gaston na ang mga sakramento at buhay-pananalangin ay nagbibigay ng lakas sa mga Kristiyano upang maisabuhay ang kanilang pananampalataya sa pamilya, trabaho, paaralan at iba pang larangan ng lipunan.
“Sayang ng buhay natin kung buong araw nasa parokya tayo… Kundi sa labas, doon sa pamilya, doon sa trabaho… kung saan man tayo, doon tayo pinapadala ng Panginoon.” Dagdag pa ni Fr. Gaston.
Binigyang-diin din ng Pari na hindi kailangang laging ipakita o ipangalandakan ang pagiging Katoliko sapagkat mas mahalagang makita ito sa paraan ng naayong pamumuhay at pakikitungo sa kapwa.
“Dahil Katoliko tayo sa loob natin, alam natin, kahit hindi natin i-announce na ako ay Katoliko, gagawin ko pa rin ‘yung dapat kong gawin. ‘Yung alam ko na mabuting gawin.” Ayon pa kay Fr. Gaston.
Paliwanag ni Fr. Gaston, bahagi rin ng pagiging isang Simbahang sinodal sa mundo ang pagtugon sa pangangailangan ng mga mahihina, kabilang ang mga biktima ng kalamidad, may sakit at nagugutom, gayundin ang pagtatayo at pagpapatakbo ng mga paaralan at ospital upang makatulong sa mga higit na nangangailangan.
