41,843 total reads
Nanawagan ang chairperson ng Conference of Major Superiors in the Philippines o CMSP sa mga religious superior na maging mga saksi at tagapagtaguyod ng kapayapaan, kasunod ng pagbisita ng mga delegado sa itinuturing na ground zero ng Zamboanga Siege sa Silsilah Elementary School.
Ayon kay Fr. Lino Gregorio Redoblado, OFM, mahalagang matutuhan mula sa karanasan ng Zamboanga na maaaring maghilom ang mga sugat ng anumang tunggalian at isulong ang pagkakaisa ng pamayanan sa pamamagitan ng pakikinig.
“Wounds can actually be healed, conflicts can actually be reconciled if we simply listen to one another,” pahayag ni Fr. Redoblado sa Radyo Veritas.
Binigyang-diin ng pari na hindi imposible ang pagkakamit ng kapayapaan, lalo na sa pagitan ng mga Kristiyano at Muslim na matagal nang namumuhay nang mapayapa sa komunidad.
“Peace is not impossible. It is possible. We just have to work for it and build bridges so that peace can be created,” ani Fr. Redoblado.
Hinikayat ni Fr. Redoblado ang mga religious superior na simulan ang pagtataguyod ng kapayapaan sa loob mismo ng kanilang mga komunidad, mga paaralan at parokya upang higit itong mapalawak sa buong pamayanan.
“Hopefully we can really be beacons or prophetic witnesses of peace in our country,” aniya.
Sinabi rin ng pari na nakita niya sa mga survivor ng Zamboanga Siege ang pagnanais na lampasan ang karanasan ng karahasan at, sa halip, ay maglaan ng sarili sa pagsusulong ng kapayapaan.
Ang pagbisita ng mga religious superior sa ground zero ay bahagi ng national convention ng CMSP, kung saan nagkaroon ng dayalogo sa pagitan ng mga residente sa lugar, partikular sa Silsilah Elementary School—isang institusyong nagsusulong ng pakikipagkaibigan at kapayapaan sa pagitan ng mga batang Kristiyano at Muslim.
Samantala, binigyang-diin ni Fr. Redoblado na bagama’t mabagal ang proseso ng peacebuilding, magiging mabunga ito kung patuloy na magtutulungan ang mga komunidad.
Nakatuon sa paksang ‘Tindig’ ang ikaapat na araw ng convention kung saan pinagnilayan ang temang ‘Standing as Prophetic Witnesses of Peace’. Stand firm in the faith; be courageous; be strong.” (1 Corinthians 16:13).
Tampok dito ang pilgrimage of peace kung saan isinusulong ang interreligious dialogue, peacebuilding initiatives, indigenous peoples, care for creation, at social outreach ministries.
