12,722 total reads
Nagpahayag ng pakikiisa ang Council of the Laity of the Philippines sa pagluluksa ng buong daigdig sa pagpanaw ni Pope Francis.
Ayon kay Sangguniang Laiko ng Pilipinas President Bro. Francisco Xavier Padilla, kaisa ng buong Simbahang Katolika ang implementing arm ng Catholic Bishops’ Conference of the Philippines-Episcopal Commission on the Laity sa pagluluksa sa pagpanaw ng Santo Papa.
Pagbabahagi ni Padilla, sadyang kahanga-hanga at hindi matatawaran ang paglilingkod ni Pope Francis bilang punong pastol ng Simbahang Katolika sa loob ng nakalipas ng 12-taon.
Tiniyak naman ni Padilla ang pag-aalay ng panalangin ng mga Pilipinong layko hindi lamang para sa kapayapaan ng kaluluwa ni Pope Francis kundi maging para sa buong Simbahang Katolika gayundin ang lahat ng mga napukaw ng presensya at paraan ng pamumuno ni Pope Francis sa Simbahang Katolika.
“We are one with the world in mourning the death of Pope Francis. He has moved the world through his life. We pray for dear Pope Francis, the Church and the world who have been affected by him.” Bahagi ng pahayag ni Padilla sa Radyo Veritas.
Pumanaw na sa edad na 88-taong gulang ang Kanyang Kabanalan Francisco.
Ibinahagi ni Cardinal Kevin Farrell, Camerlengo of the Apostolic Chamber ang balita ng pagpanaw ng punong pastol ng Simbahang Katolika ganap na alas-nuebe kwarentay-singko ng umaga ngayong araw oras sa Roma.
Ayon sa Cardinal, pumanaw si Pope Francis sa kanyang residencia sa Casa Santa Marta sa Vatican ganap na alas-syete trentay-singko ng umaga oras sa Roma -na ala-una trentay-singko ng hapon oras sa Pilipinas.
Matatandaang 38-araw na nanatili si Pope Francis sa Agostino Gemelli University Polyclinic sa Roma matapos na maospital noong ika-14 ng Pebrero, 2025 dahil sa bronchitis na kalaunan ay natukoy bilang bilateral pneumonia.
Sa pagamutan na rin ginunita ni Pope Francis ang kanyang ika-12 taong anibersaryo ng pagiging Santo Papa.
Kabilang sa mariing isinusulong ni Pope Francis ang pagiging ganap ng Simbahang Sinodal ng buong Simbahang Katolika.
