5,230 total views
Nanawagan ang opisyal ng Catholic Bishops’ Conference of the Philippines (CBCP) sa mga kabataan na huwag matakot humingi ng tulong at sumailalim sa pagsusuri dahil sa patuloy na pagtaas ng kaso ng HIV/AIDS sa bansa.
Ito ang panawagan ni Bishop Oscar Jaime Florencio, Vice Chairman ng CBCP-Episcopal Commission on Health Care ng Catholic Bishops’ Conference of the Philippines, kaugnay sa patuloy na pagtaas ng mga kaso ng naturang sakit.
Nababahala rin ang obispo sa pagtaas ng kaso, kung saan marami sa mga pasyente ang hindi maagang nagpapakonsulta para maagagapan ang karamdaman.
“Actually. we know that already (I mean the HIV/AIDS rise), as reported to us. But the problem is that these people don’t come out in the open because of the stigma or shame that they have this HIV/AIDS,” pahayag ni Bishop Florencio.
Aminado rin ang CBCP Health Care Ministry na may mga nauna na silang isinagawang interbensyon upang matulungan ang mga may HIV/AIDS, ngunit hindi ito naging sapat upang mapigil ang pagkalat ng sakit.
Sinabi ng obispo na kailangang mas paigtingin pa ang kampanya at tuloy-tuloy na pagkilos upang maabot ang mas maraming nangangailangan.
“We have already made some interventions, but to no avail. Perhaps we need more to continue our crusade so we can at least stop this malady,” ayon pa kay Bishop Florencio.
Nanawagan din si Bishop Florencio sa mga kabataan na huwag matakot lumapit at tanggapin ang mga programang tulong na iniaalok ng simbahan.
“I hope this message goes clear to our young people: Don’t be afraid to come out and avail of the intervention that the episcopal commission on health care is doing. We know that you are part of the Church we serve and love. We want to reach out and be cured,” dagdag pa ng obispo.
Batay sa ulat ng Department of Health (DOH), umabot na sa 148,831 ang naitalang kaso ng HIV mula noong 1984 hanggang Marso 2025. Sa unang tatlong buwan ng taon, naitala ang 5,101 bagong kaso, na may average na 57 kaso kada araw. Sa tala, pinakaapektado ang mga kalalakihang may edad 15 hanggang 34.
Dahil sa tumataas na bilang ng kaso, nanawagan ang DOH sa publiko na magpakonsulta at sumailalim sa pagsusuri upang mapigilan ang pagkalat ng sakit.
Ayon sa DOH, ang agarang pagtugon ay mahalaga upang maprotektahan ang kalusugan ng bawat isa at ng buong komunidad.
