156 total views
Nanawagan si Pangulong Ferdinand Marcos Jr. sa Senado na agad bumalik sa sesyon at ipagpatuloy ang paggawa ng batas.
“Get back to work. Because it’s important — ang dami nating kailangang gawin,” giit ng Pangulong Marcos Jr.
Ito ang panawagan ng Pangulong Marcos Jr. kasabay ng paggiit na maraming mahahalagang panukala ang kailangang agarang tugunan sa gitna ng umiiral na krisis sa langis at pangangailangan ng publiko.
Ayon sa Pangulo, sa mga naging pagpupulong ng economic at legislative teams ng pamahalaan, kabilang sa tinalakay ang posibleng supplemental budget at ilang pag-amyenda sa mga umiiral na batas, mahalaga ang tuloy-tuloy na sesyon ng Kongreso upang mapabilis ang paghatid ng tulong sa mga mamamayan.
Kinuwestyon din niya ang pagkakakansela ng ilang sesyon ng Senado, at iginiit na dapat may malinaw at matibay na dahilan, pati na maagang abiso, bago ito gawin alinsunod sa umiiral na proseso ng lehislatura.
“The best description I can have is that the legislature is now in disarray,” ayon sa Pangulong Marcos Jr.
Giit pa ng Pangulo, hindi aniya dapat nauuwi sa pagkaantala ng trabaho ang mga isyung administratibo, lalo’t nakasalalay dito ang pagpasa ng mga batas na direktang makakaapekto sa ekonomiya at serbisyo publiko.
Binigyang-diin din niya na habang patuloy na gumagana ang ehekutibo at hudikatura, dapat ay ganap ding gumagalaw ang lehislatura upang mapanatili ang balanse ng pamahalaan at matiyak ang tuloy-tuloy na serbisyo sa taumbayan.
“I never imagined in my entire life — my entire political life — that such a thing could happen, especially to the august — it’s not longer august now — but to the august body of the Upper House, the Senate and the Philippines,” ayon sa pangulo.
Ayon pa sa Pangulo, ang anumang pagkakaantala sa paggawa ng batas ay maaaring makaapekto sa kakayahan ng gobyerno na tumugon sa mga agarang pangangailangan ng publiko, lalo na sa panahon ng krisis.
Sa huli, iginiit ni Pangulong Marcos na ang pangunahing tungkulin ng lahat ng sangay ng pamahalaan ay maghatid ng katatagan at agarang aksyon para sa kapakanan ng mamamayan, at dapat aniyang manatiling bukas at aktibo ang Kongreso sa pagtupad ng kanilang mandato.
Ang pahayag ng Pangulo ay kaugnay na rin ng hindi pagpasok ng mga miyembro ng mayorya ng senado sa pangunguna ni Senate President Alan Peter Cayetano, makaraan ang pag-aresto kay Sen. Jinggoy Estrada sa kasong plunder.
