3,856 total views
Inanunsyo ng Vatican ang tema para sa 2026 World Day of Prayer for the Care of Creation na nakatuon sa panawagan para sa kapayapaan at pangangalaga sa kalikasan.
Pinili ni Pope Leo XIV ang temang “They shall beat their swords into plowshares and their spears into pruning hooks,” na hango sa aklat ni Propeta Isaias para sa pagdiriwang sa September 1, 2026.
Ayon sa Dicastery for Promoting Integral Human Development, binibigyang-diin ng mensahe ng Santo Papa ang ugnayan ng digmaan at pagkasira ng kalikasan na nagsisilbing pangmatagalang banta sa buhay ng daan-daang milyong katao sa buong mundo.
“Such degradation constitutes both a serious violation of our duty to care for creation, as well as a long-term threat to the lives of hundreds of millions of people,” ayon sa dicastery.
Iginiit ng Vatican na sa kabila ng lumalawak na kamalayan hinggil sa epekto ng digmaan sa mga likas na yaman, nananatiling kulang ang mga institusyon at responsableng hakbang upang maiwasan ang mga sigalot at malutas ang mga alitan sa mapayapang paraan.
Dagdag pa ng pahayag, ang napiling tema ay nagsisilbing paanyaya upang unahin ang pag-unlad, kapayapaan, at pagpapanatili ng kalikasan sa halip na karahasan at pagkasira.
“The title — a passage in which Isaiah prophesies the transformation of weapons into agricultural tools — is an explicit invitation to prioritize development and sustainability over violence and destruction.
Ang World Day of Prayer for the Care of Creation ay taunang ginugunita tuwing September 1 bilang pagkakataon upang pagnilayan ng mga mananampalataya ang kanilang pananagutan sa pangangalaga sa kalikasan at pagsusulong ng katarungang pangkapaligiran.
Hudyat din ito para sa pagdiriwang ng Season of Creation sa buong mundo sa buong buwan ng Setyembre hanggang Oktubre 4, ang Kapistahan ni San Francisco ng Assisi, ang patron ng sangnilikha.
