9,311 total reads
Binigyang-diin ni Divine Word Missionary priest at 2025 Ramon Magsaysay Awardee Rev. Fr. Flaviano Antonio “Flavie” Villanueva, SVD na hindi sapat ang kawalan ng batas na nagpapahintulot sa capital punishment sa bansa kung nagpapatuloy naman ang kultura ng karahasan sa lipunan.
Sa programang Barangay Simbayanan sa Radyo Veritas ay ibinahagi ni Fr. Villanueva na bagama’t walang umiiral na batas sa Pilipinas na nagpapataw ng death penalty ay nasaksihan pa rin ng publiko ang pag-usbong ng kultura ng pamamaslang noong panahon ng administrasyon ni dating Pangulong Rodrigo Duterte.
Ayon sa Pari na siya ring Founder at President ng Arnold Janssen Kalinga Foundation at Program Paghilom, magpahanggang sa ngayon ay nararanasan pa rin sa lipunan ang epekto ng kultura ng pagpaslang na nagsimula sa ilalim ng administrasyong Duterte.
“Wala man sa ating batas ang capital punishment pero nakita naman natin kung paano nagsimula sa panahon ni [dating Pangulong Rodrigo] Duterte ang pagpapapatay as a Mayor, as a President and the culture is lingering and is very much affecting us as we speak.”
Bahagi ng pahayag ni Fr. Villanueva Radyo Veritas.
Iginiit ni Fr. Villanueva na higit sa pagkakaroon o kawalan ng batas ay mas mahalaga ang pagkakaroon ng mga pinunong may integridad at handang ipatupad ang mga alituntuning nakabatay sa dignidad ng tao at sa mga pagpapahalaga na itinuturo sa Ebanghelyo.
“Hindi kailangan na may batas, dapat mayroong matinong mga tao na handang magpatupad at hadlangan ang anumang batas na komukontra sa Ebanghelyo, otherwise tuloy lang at magpapatuloy lang kung anong laway at anong nais ng lideratong baluktot.” Dagdag pa ni Fr. Villanueva.
Binigyang-diin din ng Pari na kinakailangang manaig ang pamumunong nakabatay sa katotohanan, katarungan, at paggalang sa buhay upang hindi na maipagpatuloy ang anumang uri ng karahasang sumasalungat sa mga turo ng Simbahan.
Pagbabahagi ni Fr. Villanueva, napapanahon ang prayer intention ng Kanyang Kabanalan Pope Leo XIV ngayong buwan ng Hulyo upang muling bigyang diin ng punong pastol ng Simbahan ang paggalang at pagngangalaga sa buhay at dignidad ng tao sa lahat ng yugto nito.
Matatandaang inilaan ni Pope Leo XIV ang kanyang prayer intention ngayong buwan ng Hulyo para sa pagtataguyod sa dignidad ng bawat tao, lalo na sa gitna ng iba’t ibang banta sa buhay at paglabag sa karapatang pantao sa iba’t ibang bahagi ng daigdig.
