112 total views
Dismayado ang Bantay Senado sa hindi pagdalo ni Vice President Sara Duterte sa unang araw ng kanyang impeachment trial sa Senado.
Ayon sa non-partisan citizens’ monitoring network, matagal nang hinihintay ng publiko ang paglilitis kaya’t nararapat lamang na personal na humarap ang Bise Presidente sa proseso at sagutin ang mga paratang laban sa kanya.
Sinabi rin ni Prof. Cleve Arguelles-convenor at tagapagsalita ng grupo na maging ang ilang residente ng Barangay Krus na Ligas na dumalo sa kanilang Impeachment TamBayanan community watch party ay nagpahayag ng pagkabigo sa hindi pagharap ng Pangalawang Pangulo sa unang pagdinig.
Ikinagalak naman ng Bantay Senado ang paninindigan ng House prosecution na dapat ibatay ang paglilitis sa mga ebidensya at testimonya ng mga saksi, at hindi lamang sa mga usaping teknikal o procedural.
Binigyang-diin din ng grupo na mahalagang manatiling nakatuon ang impeachment court sa paghahanap ng katotohanan sa pamamagitan ng maayos na pagtalakay sa mga ebidensya at testimonya ng mga testigo.
Muli ring nanawagan ang Bantay Senado para sa isang patas, transparent, at bukas na impeachment trial na mahigpit na nakabatay sa ebidensya.
Hinikayat din nito ang publiko na manatiling mapagmatyag at makiisa sa pagbabantay sa buong proseso upang matiyak ang pananagutan at pagsunod sa Konstitusyon.
