1,150 total reads
Mahigit sa 400 pamilya na dating naninirahan sa palibot ng Bulkang Taal ang natulungan ng Arkidiyosesis ng Lipa na magkaroon ng bagong tahanan.
Ito ang ibinahagi ni Rev. Fr. Jayson Siapco, tagapamuno ng Lipa Archdiocesan Social Action Commission o LASAC matapos na muling magligalig ang bulkang Taal at magsilikas ang ilan sa mga residente.
Ayon kay Fr. Siapco, marami pa ring pamilya ang nanumbalik sa paninirahan sa permanent danger zone ay sinisikap ng Arkdiyosesis na makatulong sa pamamagitan ng pagpapatayo ng mga bagong bahay para malayo sa peligro.
“Meron kaming program na integrity of communities isa sa gawain nito bukod sa meron na kaming housing ito ang nakikita namin na pinakamahalaga and I suggest ito ang pinaka importante din para makatuloy sa pag-ahon at pagbangon ang mga nasalanta,” pahayag ni Fr. Siapco sa panayam ng Radyo Veritas.
Nakipagtulungan ang Arkidiyosesis ng Lipa sa mga residente na makapagtayo ng kanilang mga bagong tirahan sa kondisyon na ang lupang pagtatayuan ay nabili na ng napiling residente o kaya naman ay pag-aari ng kanilang kaanak.
Inihayag ni Fr. Siapco na ang pondo na ginagamit ng Arkidiyosesis sa nasabing proyekto ay mula sa mga donasyon ng iba’t-ibang indibidwal.
Sa kasalukuyan ay nasa 1,400 na pamilya ang nagsilikas dahil sa muling pagliligalig ng Bulkang Taal.
Magugunitang taong 2020 ng umabot sa 26,000 pamilya ang naapektuhan ng phreatic explosion ng Bulkang Taal kung saan higit sa 373 evacuation center ang binuksan para sa mga nagsilikas.
