2,819 total reads
Ang Mabuting Balita, 28 Nobyembre 2023 – Lucas 21: 5-11
MGA PEKENG PROPETA
Noong panahong iyon, pinag-uusapan ng ilang tao ang templo – ang kahanga-hangang mga bato na ginamit dito at ang mga palamuti nito na inihandog ng mga tao. Kaya’t sinabi ni Jesus, “Darating ang panahong lahat ng nakikita ninyong iyan ay iguguho, walang batong ititira sa ibabaw ng kapwa bato.”
Tinanong nila si Jesus, “Guro, kailan po ito mangyayari? At ano ang magiging palatandaan na ito’y magaganap na?” Sumagot siya, “Mag-ingat kayo at nang hindi mailigaw ninuman! Sapagkat marami ang darating sa aking pangalan na magsasabi, ‘Ako ang Mesias!’ at, ‘Dumating na ang panahon!’ Huwag kayong susunod sa kanila. Huwag kayong mabagabag kung makabalita kayo ng mga digmaan at mga himagsikan. Dapat mangyari ang mga ito, ngunit hindi darating karaka-raka ang wakas.” At sinabi pa niya, “Makikipagdigma ang bansa laban sa kapwa bansa at ang kaharian sa kapwa kaharian. Magkakaroon ng malalakas na lindol, magkakagutom at magkakasalot sa iba’t ibang dako. May lilitaw na mga kakila-kilabot na bagay at mga kagila-gilalas na tanda buhat sa langit.”
————
Nakakatakot ang ebanghelyo tulad ng prediksyon kamakailan lamang na magkakaroon ng “solar storm” mula Nobyembre 25 hanggang Nobyembre 26 na maaaring tumama sa mundo at magkaroon ng isang “geomagnetic storm” na gugulo sa “magnetic field” at “atmosphere” ng mundo.
Nagsalita si Jesus tungkol sa mangyayari sa Templo ng Jerusalem at siya’y tinanong nila kung kailan ito mangyayari. Hindi niya sinabi kung kailan, ngunit sinabihan sila na huwag paliligaw o magpalinlang sa mga magpapanggap na Mesiyas, o sa maikling salita, huwag magpalinlang sa MGA PEKENG PROPETA. Tunay na napakaraming pekeng propeta ngayon, at ang pinakamasama ay yaong ginagawa ang mali na tama, o ginagawa ang imoral na moral. Binabaluktot nila ang mga nakasulat sa Bibliya nang magamit para sa kanilang pangangailangan. Ang tunay na nakakatakot ay hindi ang mga malalakas na lindol, taggutom at salot sa iba’t ibang dako. Ang tunay na nakakatakot ay kapag ang mga ito ay maganap at tayo ay masawi, at hindi natin makamit ang buhay na walang hanggan sapagkat hinayaan nating malinlang tayo ng MGA PEKENG PROPETA.
Panginoon, nais namin maging laging handa na matawag sa mundong ito upang makamit namin ang buhay na walang hanggan kasama mo!
