486 total reads
Hiniling ng Federation of Free Workers sa administrasyong Duterte na tuparin muna ng gobyerno ang obligasyon nito sa Social Security System (SSS) na magbigay ng pondo kada taon bilang tulong sa ahensiya.
Ito ayon kay Atty. Sonny Matula, Presidente ng Federation of Free Workers ay bago ipatupad ang pina-planong karagdagang 1.5 percent na kontribusyon ng mga miyembro ng SSS.
Sa karagdagang kotribusyon kukunin ang dagdag na P2,000 pension sa mga SSS pensioner na ipinatupad ngayong buwan ang P1,000 habang sa 2022 pa ang natitirang P1,000.
Sinabi ni Atty. Matula na simula ng maitatag ang SSS noong 1954, isang beses pa lamang nagbigay ang pamahalaan ng ayuda dito na ayon sa batas dapat ay taunan.
“Mula nang isilang ang SSS noong 1954, isang beses lang nagbigay ang government ng pondo mula nun wala na itong kontribusyon, at nanggagaling na lahat ang pondo sa employers at mga manggagawa eh sa batas dapat mag-allocate ang gobyerno yearly ng pondo sa SSS operations and expenses.” ayon kay Atty. Matula sa panayam ng Radio Veritas.
Sa record, nasa 11.5 milyon ang miyembro ng SSS habang nasa 2.5 milyon ang pensioners.
Sa social doctrine of the church, kinakailangan na ang estado ay gumagawa ng mga programa na ang nakararami ang nakikinabang gaya ng mahihirap na sila rin namang pangunahing nagbibigay kita sa mga negosyo dahil sila ang pinakamalaking bilang ng mga manggagawa.
