212 total views
Pinaboran ng dating pangulo ng Catholic Bishops’ Conference of the Philippines ang bagong programa ng pamahalaan na “P3 Program” o Pondo sa Pagbabago at Pag–asenso na direktiba ni Pangulong Rodrigo Duterte upang mapalitan ang mga “5-6” money lending system.
Ayon kay Lingayen Dagupan Archbishop Emeritus Oscar Cruz, maganda ang programang ito ng pamahalaan ngunit hinamon nito ang gobyerno na maging ‘transparent’ at maging masikap na maabot ang mga mahihirap na micro – entrepreneur, market vendors at magsasaka sa naturang programa.
Bagamat hindi sang – ayon ang nakararaming Pilipino sa naturang programa, ipinaliwanag ni Archbishop Cruz na mas makabubuti ang P3 dahil sa mas mababang interes 10 percent per annum lamang ang ipapatong ng gobyerno sa mangungutang, mas mababa sa 20 percent na ipinapatong ng mga “5-6” lending company.
“Ang pagpapautang ay okay basta ang interes lamang ay hindi naman ‘usurious interest.’ Ibig sabihin talagang hindi makatwiran yung magpapautang ka, pagkatapos yung nangutang sa iyo hirap na hirap magbayad at hindi lang ganun kundi ang ipinangbabayad ay yung kanilang kinikita,”pahayag ni Archbishop Cruz sa panayam ng Radyo Veritas.
Binalaan naman ni Archbishop Cruz ang ilang nagpapautang na nagpapatong ng napakalaking tubo na humahantong sa “usury lust” o bisyo ng mas mataas na interes at hindi na iniisip ang kanilang pinautang na halos nagdurusa.
“Usury’ ang tawag dun o ‘usury lust,’ masyadong napakalaki ang interes. Samakatuwid, ang nangungutang ay hindi nakikinabang kundi sila pa ang nagdurusa. ‘Usury’ is very unwelcome and it is a definitely a vice, bisyo iyan,” paglilinaw pa ni Archbishop Cruz sa Veritas Patrol.
Nabatid na ngayong buwan target ng Department of Trade and Industry ang Mindoro, Saranggani at Leyte na kabilang sa 30 mahihirap na probinsiya sa buong bansa na makikinabang sa P3.
Samantala, nauna na ring sinabi ni Apostol San Pablo sa kanayang unang sulat kay Timoteo na ang pagmamahal ng salapi ay siyang pinag – uugatan ng lahat ng kasakiman at kasamaan.
