13,937 total reads
Tiniyak ng mga Pilipinong pari sa Los Angeles California ang pagtugon sa pangangailangan ng mga residenteng apektado ng wildfire sa lugar.
Ayon kay Fr. Rodel Balagtas, Parish Priest ng Incarnation Church sa Glendale at Head ng Filipino Ministry, ng Archdiocese of Los Angeles, bagamat naghahanda ito sa posibleng paglikas ay nanatiling bukas ang kanilang parokya para sa mga nangangailangan ng kanlungan sa gitna ng trahedya.
Sinabi ng pari na nakatanggap ito ng evacuation warnings lalo’t hindi pa tuluyang naapula ang sunog sa kalapit na lugar.
“We have some precautionary measures para ready for any evacuations pero kung wala, our parish church is open sa mga taong nag-evacuate from nearby areas; they can use our facility, our church and our school auditorium for any families who want to stay out of the fire,” pahayag ni Fr. Balagtas sa Radio Veritas.
Tinukoy ni Fr. Balagtas ang Corpus Christi Church sa Pacific Palisades na kabilang sa nasunog ngunit tiniyak na maraming simbahan sa Los Angeles ang nagbukas para sa mga displaced indibiduals para kanilang kaligtasan.
Ayon naman kay Healing Touch Anchor priest, Fr. Michael Montoya, Parish Priest ng Our Lady of the Assumption Parish sa Claremont, California agad na kumilos ang mga parokya ng arkidiyosesis upang tugunan ang pangangailangan ng mga apektadong residente at binuksan upang maging pansamantalang kanlungan sa mga nawalan ng tahanan.
Patuloy na umapela ng panalangin ang pari para sa kinakaharap ng Los Angeles gayundin ang panawagan ng pagtulong subalit binalaan ang publiko na maging maingat laban sa mga mapanamantalang indibidwal na ginagamit ang pagkakataon para sa scam activities.
“Lahat ng mga parokya ngayon ay nagmo-mobilize ng kanilang mga parishioners to be able to help in many different ways; sa mga Kapanalig na nais tumulong pumunta lang sa website ng Archdicoese of Los Angeles, may section doon na magsasabing paano makatulong in cash or in any ways and they have also identified areas kung saan pwedeng magpadala ng tulong,” pahayag ni Fr. Montoya.
Apela din nito sa mga Pilipino na tigilan ang pagbabahagi ng mga larawang nagsasabing ‘God less’ ang lugar kaya’t tila parusa ng Diyos ang nangyaring sunog sapagkat buhay ang pananampalataya sa Los Angeles at aktibo ang mamamayan sa mga gawaing simbahan lalo na ang paglingap sa kapwa.
Sa kasalukuyang datos 24 na ang nasawi sa wildfire na ayon kay California Governor Gavin Newsom maaaring ito na ang pinakamapinsalang trahedyang nangyari sa Amerika sa kasaysayan na puminsala ng libu-libong mga bahay at ari-arian at sapilitang nagpalikas sa mahigit 100, 000 katao.
Una nang nakiisa at nakidalamhati si Pope Francis sa mga apektado ng wildfire kasabay ng mga panalanging katatagan ng loob upang malampasan ang trahedya sa tulong at paggabay ng Panginoon.
