88,000 total reads
Nakakabahala ito Kapanalig, nahaharap ang Pilipinas sa kasalukuyan sa “Functional literacy crisis”.
Hindi katanggap-tanggap sa isang magulang na napabilang ang kanyang anak sa mahihinang estudyante… nahihirapan o hindi makaunawa…isa itong insulto para sa isang magulang na halos hindi na makakain ng tatlong beses kada araw, hindi na makabili ng personal na pangangailangan mapaaral lamang ang anak.
Sa pinakahuling 2024 Functional Literacy, Education and Mass Media Survey (FLEMMS), lumabas na 18-milyong Junior high school graduates ay nahihirapan sa comprehension.
Natural Kapanalig, nagtuturuan na kung sino ang may sala! sa patuloy na mababang antas ng functional literacy sa Pilipinas. Hindi daw puwede ito isisi sa pamahalaan, sa mga nagpapatakbo ng educational system… lalu na, huwag itong isisi sa mga guro.
Biruin mo, nasa krisis na nga Kapanalig, magsisisihan pa? Di ba nararapat natin na ituring ang statistical data na napananahong panawagan sa pagkilos ng lahat sektor sa halip na magpagalingan ng paliwanag? Wala nang sisihan, mareresolba ang mababang functional literacy sa bansa sa pagtutulungan at pagkakaisa.
Sinasabi ng Teachers Dignity Coalition, hindi problema ang mga guro…sila pa nga ang pangunahing biktima ng sistema na kumpleto sa sangkap ng kakapusan sa pondo, maling polisiya, katiwalian at malalim na ugat ng hindi magkakapantay-pantay o socio-economic inequalities..Bukod pa overworked, underpaid at walang suporta ang mga guro…Ikinakatwiran din na nahihirapan ang milyun-milyong mag-aaral na unawain ang mga aralin dahil sa kumakalam ang sikmura at inaatupag kung paano makaraos ang pamilya bawat araw. Kapanalig, nais ng pamahalaan na maibsan ang kahirapan sa pamamagitan ng accessible education..pero, isinara naman nila ang pinto sa mga mahihirap na estudyante dahil sa implementasyon ng K12 program
Ang kahinaang ito ng mga mag-aaral ay sumasalamin sa lumalalang kapabayaan sa educational system ng bansa. Mas malaki pa ang budget ng mga pulitiko sa dole-out at ayuda kaysa budget ng Department of Education.
Kapanalig, napaka-importante ng kuwalidad na edukasyon para sa kinabukasan ng bansa…dahil mula sa sektor na ito ang mga susunod na mamamahala at lider ng bansa. Walang puwang dapat ang pulitika sa edukasyon.
Isinasaad sa 1987 Philippine Constitution o Saligang Batas Article XIV Section 1-5 na “The state shall protect and promote the right of all the citizens to quality education at all levels and shall take appropriate steps to make such education accessible to all.
Sinasabi sa Gaudium et Spes 59-60… education as a ‘common good’. The universal right to education and schooling for all. Education cannot be subservient to economic power and its workings.
Kapanalig, misyon ng Youth Servant Leadership and Education Program(YSLEP) ng Caritas Manila na makatulong upang matugunan ang laganap na kahirapan sa Pilipinas, mapatatag ang quality education sa bansa, matulungan ang mga mahihirap na mag-aaral na mai-ahon sa kahirapan ang pamilya at maging bahagi ng paglago ng ekonomiya ng bansa.
Sumainyo ang Katotohanan.
