23,887 total views
Nanawagan si Pope Leo XIV sa mga Kristiyanong pulitiko na manatiling matatag sa kanilang pananampalataya at isabuhay ito sa pagtupad ng kanilang tungkulin bilang mga lingkod-bayan.
Binigyang-diin ng Santo Papa na hindi sapat ang mga pagpapahalaga upang baguhin ang mundo kung hindi ito nakaugat at nakasentro kay Kristo.
“The salvation that Jesus obtained through His death and resurrection…encompasses all dimensions of human life, such as culture, the economy and work, family and marriage, respect for human dignity and life, health, as well as communication, education, and politics,” ayon kay Pope Leo.
Sa kanyang mensahe sa mga halal na opisyal mula sa Val-de-Marne, France, sinabi ng Santo Papa na ang kaligtasang hatid ng pagkamatay at muling pagkabuhay ni Hesus ay sumasaklaw sa lahat ng bahagi ng buhay—sa kultura, ekonomiya at trabaho, pamilya at pag-aasawa, kalusugan, edukasyon, komunikasyon at maging sa politika.
Hinimok ng Santo Papa ang mga Kristiyanong pinuno ng pamahalaan na patuloy na kumapit kay Kristo sa gitna ng mga kahinaan at pagmamalabis ng makabagong lipunan.
Iginiit ng pinunong pastol, sa Kanya lamang matatagpuan ang tunay na lakas at direksyon upang makapagsilbi nang tapat at makabuluhan sa kanilang nasasakupan
Binigyang-diin din ni Pope Leo na ang pananampalataya at tungkulin ay hindi dapat magkahiwalay.
Paliwanag ng SAnto Papa, tungkulin ng Kristiyanong opisyal na palalimin ang pag-unawa sa doktrina ng simbahan, lalo na sa mga katuruang panlipunan, at isabuhay ito sa paggawa ng mga batas.
“You are therefore called to strengthen yourselves in the faith, to deepen your understanding of the doctrine—especially the social doctrine—Jesus taught the world, and to put it into practice in the exercise of your duties and in the drafting of laws.”
Hinimok ng Santo Papa ang mga pulitiko na maging matatag, ipaglaban ang katotohanan, at isulong ang lipunang makatarungan, mapayapa, at makatao.
