8,803 total reads
Nanawagan si Antipolo Bishop Ruperto Cruz Santos sa kabataan at mamamayan na makiisa sa isasagawang kilos-protesta sa Setyembre 21 bilang panawagan at pagtutol sa malawakang katiwalian sa pamahalaan.
Ang pagkilos na gaganapin sa Edsa Shrine at Luneta ay nataon din sa paggunita sa ika-53 anibersaryo ng pagdedeklara ng Martial Law ng dating Pangulong Ferdinand Marcos Sr.
Sa kanyang mensahe, binigyang-diin ng Obispo na ang pag-aalala sa nakaraan ay dapat maging panawagan para sa katarungan at katuwiran.
“Fifty-three years will have passed since Martial Law was declared—a time that wounded our nation’s soul. And on that day, our young people will rise again, not in violence, but in truth,” ayon kay Bishop Santos.
Ayon sa Obispo, ang bilyun-bilyong pisong nawaldas sa flood control ay hindi lang numero kundi katumbas ng mga nasirang tahanan, mga nalunod na pananim, at mga gumuhong pangarap.
Idinagdag pa niya na ito ay malinaw na paglabag sa utos ng Diyos, ang “Huwag Magnakaw.”
Tinukoy din ng Obispo ang mga politiko, kontratista, at ilang opisyal ng Department of Public Works and Highways (DPWH) na dapat managot at ibalik ang ninakaw na pondo.
“They must return what they have stolen, face the courts of justice, and ultimately, the judgment of God,” giit ni Bishop Santos.
Gayunpaman, nanawagan siya sa kabataan na manatiling mapayapa at huwag hayaang lamunin ng galit ang kanilang pagkilos.
“Let your voices thunder, but your hands stay clean. Do not let anger consume you. The Lord sees your pain. He hears your cries. And He will not be mocked,” dagdag pa ng Obispo.
Binanggit din ni Bishop Santos na ang naturang martsa ay dapat maging “prayer in motion” at patunay na ang kabataang Pilipino ay gising at hindi bingi sa panawagan ng bayan.
“Let justice roll down like waters, and righteousness like an ever-flowing stream,” paalala ng Obispo na hango mula sa aklat ni Amos.
Ipinapanalangin din ng Bishop Santos na nawa ay gabayan ng Espiritu Santo ang mga lalahok sa payapang pagtitipon at palakasin ni Kristo ang kanilang loob, habang kasama nila sa paglalakbay ang mapaghimalang Birhen ng Antipolo, Our Lady of Peace and Good Voyage.
