581 total reads
Hinimok ni Tarlac Bishop Roberto Mallari ang mga mananampalataya na maging matatag sa pagtatanggol sa kabanalan ng buhay sa kabila ng iba’t ibang hamon at pagsubok sa lipunan.
Ito ang bahagi ng mensahe ng Obispo sa isinagawang Penitential Walk for Life 2026 sa Diocese of Tarlac noong ika-21 ng Marso, 2026, na pinangunahan ng Council of the Laity ng diyosesis.
Ayon kay Bishop Mallari, ang sama-samang paglalakad ay hindi lamang pisikal na gawain kundi isang espiritwal na paglalakbay ng panalangin, pagsisisi, at paninindigan para sa dignidad ng bawat buhay, lalo na sa gitna ng mga suliraning kinahaharap ng bansa at ng mundo.
“Sa ating paglalakbay na ito, ating iharap sa Diyos ang ating taimtim na panawagan na itaguyod ang kabanalan at halaga ng bawat buhay, lalo na sa gitna ng mga hamon na kinahaharap ng ating bayan at ng buong mundo,” Bahagi ng pagninilay ni Bishop Mallari.
Binigyang-diin din ng Obispo ang epekto ng mga digmaan, partikular sa Gitnang Silangan, kung saan maraming sibilyan, lalo na ang mga bata, ang nagdurusa at hinimok ang mga mananampalataya na maging matapang sa pagtatanggol ng buhay.
Nagbabala rin si Bishop Mallari sa umiiral na kultura ng paninira at pananakot, kabilang ang paggamit ng ‘trolls’ laban sa mga nagsusulong ng katotohanan at pananagutan sa lipunan.
“You will be bullied, you will be threatened dahil sa paninindigan para sa buhay, para sa katotohanan,” Dagdag pa ni Bishop Mallari.
Kaugnay nito, binigyang-diin ni Bishop Mallari ang kahalagahan ng pagkakaisa, lalo na sa loob ng pamilya, na nagsisilbing pangunahing pundasyon ng lipunan.
Ipinaalala rin ng Obispo ang turo ni Pope Francis hinggil sa pagpapatawad at pagmamahalan sa pamilya kung saan iginiit din ni Bishop Mallari na ang kakulangan ng pagkakasundo ay maaaring magdulot ng pagkasira ng ugnayan.
“Do not let the sun go down without reconciling with one another,” Paalala ni Bishop Mallari,
Dagdag pa ng Obispo, ang Penitential Walk ay paanyaya rin sa bawat isa na kilalanin ang sariling pagkukulang at magbalik-loob sa Diyos.
“Ang ating paglalakbay ay isang panawagan sa aktibong pananampalataya… maging tagapagtanggol ng buhay sa bawat pagkakataon,” ani Bishop Mallari.
Samantala, hinimok din ng Obispo ang mga mananampalataya na patuloy na magtiwala kay Kristo bilang pinagmumulan ng lakas sa pagtatanggol ng buhay ng bawat nilalang.
“Remember… it is only through Him that we have power and the grace to persevere… in our desire to fight for life and to protect life,” Paalala pa ni Bishop Mallari.
