2,446 total reads
Humingi ng paumanhin si Kalookan Bishop Pablo Virgilio Cardinal David kaugnay ng insidente sa Salubong noong Linggo ng Pagkabuhay sa Diocesan Shrine and Parish of the Immaculate Conception sa Malabon City, kung saan ginamit ang kalapati sa tradisyon habang nakatali ang mga pakpak nito at ikinabit pa sa mga lobo.
Ayon kay Cardinal David, walong dekada nang ginagawa ng nasabing parokya ang tradisyon.
“Ako na po ang humihingi ng paumanhin sa nakaugaliang tradisyon doon sa parokya ng Concepcion sa Malabon. Walong dekada na pala nilang ginagawa ang tradisyon na iyon. Akala ko kasi tapos na ‘yung Salubong ‘pag nahablot na ng kalapati ang itim na belo,” ayon kay Cardinal David sa kanyang homiliya nitong Martes sa Walong Araw na Pagdiriwang ng Pasko ng Muling Pagkabuhay sa San Roque Cathedral Parish.
Sinabi ng kardinal na tunay ngang kalupitan ito hindi lamang sa ibon, kundi maging sa mga isda na makakalunok ng mga lobo pagbagsak ng mga ito sa dagat.
Tiniyak naman ni Cardinal David na hindi na mauulit ang ganitong insidente sa mga susunod na pagdiriwang ng Salubong sa parokya ng Concepcion, maging sa iba pang parokya sa diyosesis.
“Kaya rest assured po, pinakikiusap ko na sa mga organizer ng Salubong na huwag na pong uulitin sa susunod na taon,” ayon kay Cardinal David.
Samantala, naglabas ng bukas na liham ang Animal Kingdom Foundation (AKF) hinggil sa hindi makataong pagtrato sa mga hayop sa mga relihiyosong pagdiriwang.
Iginiit ng AKF na ang paggamit ng buhay na hayop sa paraang nagdudulot ng stress o pinsala ay taliwas sa pagpapahalaga sa habag, pangangalaga, at malasakit sa lahat ng nilikha.
“We respectfully emphasize that symbolism should never come at the expense of the welfare and humane treatment of living creatures,” saad ng AKF.
Paliwanag pa ng grupo na ang anumang gawain na nagdudulot ng pagpigil, pagbitin, o pagpapahirap sa mga hayop ay paglabag sa Republic Act No. 8485, o ang Animal Welfare Act of 1998 na binago ng RA 10631, na nagtataguyod ng proteksyon ng mga hayop laban sa kalupitan, pang-aabuso, kapabayaan, at pagdurusang hindi kinakailangan.
Nananawagan ang AKF ng masusing pagsusuri sa insidente, malinaw na patnubay sa makatao at etikal na pagtrato sa hayop, at paggamit ng alternatibong simbolo na hindi nangangailangan ng buhay na hayop upang maiwasan ang ganitong pangyayari sa hinaharap.
Binigyang-diin ng grupo na alinsunod ito sa mga aral ni San Francisco ng Assisi, na itinuturing na karapat-dapat ang lahat ng nilalang sa pangangalaga, dangal, at paggalang.
“We share this message in the spirit of compassion, accountability, and constructive dialogue. We remain hopeful that, together, we can ensure that our religious celebrations continue to reflect not only faith and devotion, but also kindness toward all living beings,” saad ng AKF.
