217 total views
Nananalangin si Father Joel Saballa na isa sa mga impeachment complainant laban kay Vice-president Sara Duterte na mabibigyan ng patas na pagkakataon ang impeachment proceedings laban sa Opisyal sa oras na tuluyang madinig ito sa Senado.
Ayon kay Father Joel Saballa, ikinagagalak niya kasama ang iba pang complainant ang boto ng 257 na mga kongresista na pumabor sa impeachment dahil naging sapat at nakita ng mga mambabatas na totoo ang mga basehan at ebidensya ang inihain na mga reklamo laban sa Pangalawang Pangulo.
“Natutuwa kasi doon sa 257 na bumoto doon sa impeachment at nakikita nila na valid o yung ipresentan nating mga ebidensya, valid o yung mga na-present nating reklamo sa pangalawang Pangulo. At nakita naman natin yung fairness na ginawa ng Committee on Justice hanggang sa pagdidepensa nito sa Kongreso kahapon. Tayo’y nandoon din at kasama tayo sa proseso ng pakikinig doon sa Kongreso hanggang sa ito’y natapos. At yun nga, ngayon binabantayan natin ng Senado” ayon sa panayam ng Radyo Veritas kay Fr.Saballa.
Ayon sa Pari, nakita rin nila ang pagiging patas ng House Committee on Justice sa naging pagtalakay at pagdepensa sa usapin sa Kongreso.
Umaasa rin ang Pari na agad na maipapadala sa Senado ang articles of impeachment upang kagyat na makapag-convene na ang impeachment court.
Nanawagan naman si Fr.Saballa sa mga senador na hayaang umusad ang proseso upang maipakita na nananatiling buhay ang demokrasya sa bansa at mabigyan ng pagkakataon na marinig ang panig ni Duterte gayundin ang mga ebidensyang ilalatag ng prosecution team mula sa Kongreso.
“At umaasa tayo na nanawagan tayo sa mga Senador na sana ay bigyan muna ng pagkakataon ang proseso nito.Ipagitan natin na buhay ang demokrasya sa ating bansa para magkaroon tayo ng pagkakataon na tayo ay makinig o marinig ano yung panig ng Pangalawang Pangulo.At the same time, mailatag naman ang ebedensya ng prosecution team na bubuin ng Kongreso.”
Iginiit pa ng pari na patuloy na makikiisa ang religious sector hanggang sa matapos ang impeachment proceedings bilang suporta rin sa mga naghain ng reklamo at ebidensya sa kaso.
