14,728 total reads
Nanawagan si Taytay Palawan Bishop Broderick Pabillo sa mga Senador na dinggin at ayusin ang proseso sa impeachment trial laban kay Vice President Sara Duterte.
Sinabi ng Obispo na sa pamamagitan ng impeachment trial ay magkaroon na ng kaliwanagan hinggil sa mga kasong ipinaparatang sa Bise-presidente at maipakita sa mga Pilipino na walang sinuman, kahit pa ang mga naihalal na opisyal ang mas mataas pa sa batas.
“Kaya sana po itong mga senators natin, ang hahanapin nila ay ang ikakabuti ng bayan, at hindi ang kanilang katapatan sa iisang pamilya, dito po sa atin, ang pinaglilingkuran natin ay ang bayan at hindi iisang pamilya, at sila at nakaupo diyan kasi sila ay ibinoto ng taong bayan, kaya dapat ipalabas sa taong bayon ‘Ano ba ang nangyayari sa ating mga elected officials?’ magkaiba po yung dahilan ng impeachment process, kaya hinihingi ko po na maging fair ang ating mga senators, ang kanila pong loyalty ay wala sa isang pamilya at wala sa self-interest, ngunit dapat itong nasa taong bayan.”
Nagpaabot naman ng pasasalamat si Bishop Pabillo sa mga mambabatas sa Mababang Kapulungan ng Kongreso sa pag-apruba sa impeachment complaint laban sa ikalawang pinakamataas na opisyal ng bansa.
Inihayag ng Obispo na ipinakita ng mga kongresista ang interes o kalooban ng taong bayan na dapat sundin ng mga naihalal na opisyal dahil pinaglulungkuran nila ang Pilipinas at hindi isang pamilya.
“Ako po’y nagpapasalamat sa mga Congress people na bumoto para sa impeachment ni Vice President Sara, kailangan po natin ang impeachment na ito upang mapakita po sa mga tao ang kalagayan ng ating bansa at ang ginagawa ng mga leaders atin. At ito po’y isang parang din upang mapanagot ang mga leaders sa atin na hindi dahil sila ay nasa posisyon, magagawa nila ang gusto nila,” ayon pa sa panayam ng Radyo Veritas kay Bishop Pabillo.
