259,065 total views
Puro politika…puro grandstanding….political manuevering… political interest…political survival!
Kapanalig, ito ang nangingibabaw ngayon na usapin sa bansa. Puro para sa kanila, lahat para sa kanila., iyan ang ating mga lider sa Pilipinas? Paano naman ako, paano naman tayong mahihirap na Pilipino?
Pero ang katotohanan, walang pakialam ang ating mga lider ng bansa sa totoong nangyayari sa Pilipinas. Kapanalig, 23.2-percent ng pamilyang Pilipino ang dumaranas ng “involuntary hunger”, mga pamilyang halos walang makain ng isang beses sa loob ng tatlong buwan. Sa nasabing porsiyento, 5.5-percent dito ay halos wala nang makain araw-araw.
Ang tumataas na bilang ng pamilyang Pilipino na nagugutom ay base sa Social Weather Survey sa unang quarter ng taong 2026.
14.5-milyong Pilipino ang nagugutom sa unang quarter ng taong kasalukuyan, ano ang ginagawa ng kasalukuyang administrasyon? nang mga mambabatas? Mamulitika lang?
Mula sa dating 20.1-percent noong nakaraang taon, tumaas ito sa 23.2-percent ngayong taon. Ibig sabihin Kapanalig, walang ginawa, walang programa ang pamahalaan para tugunan at itaas ang antas ng mga mahihirap.
Magaling ang ating mga opisyal ng pamahalaan, ang ating mga mambabatas sa pagbibigay ng ayuda (doleout), panandaliang tugon sa kahirapan. Sa pagbibigay ng ayuda, wala ka nang iisipin pa na programa, madali na… malaki pa ang kita.
Kapanalig, ang Visayas ang nakapagtala ng 28-percent na hunger incidence, 22.4-percent naman sa Luzon, Metro Manila-22 porsiyento habang 21.7-percent sa Mindanao. Lumabas sa survey na ang dating itinuturing na non-poor ay kabilang na sa mga nagugutom. Ano ang dahilan Kapanalig?
Ang simbahang katolika ay aktibo sa pagtulong sa mga mahihirap na pamilya sa alinmang panig ng bansa. Hindi matutumbasan ang mga pro-poor programs ng simbahang katolika, katulad ng Caritas Manila at iba’t-ibang social action center ng 86 na diyosesis at arkidiyosesis sa bansa.
Kapanalig, sinasabi ng Compendium of the Social Doctrine of the Catholic Church 184 “ The church’s love for the poor is inspired by the Gospel of the Beatitudes, by the poverty of Jesus and his love for the poor”.
Sa kasalukuyang panahon, may halaga lang ang mga mahihirap sa mga pulitiko at elected na opisyal ng pamahalaan sa panahon nang halalan. Kapag halalan, halos lumuhod ang mga kandidato sa mga botante upang sila ay ihalal, kapag nakaupo na sa puwesto., patay malisya na.
Sumainyo ang Katotohanan.
