6,102 total views
Nagpahayag ng matinding pagkabahala ang Living Laudato Si’ (LLS) Philippines sa patuloy na pagputol ng mga puno sa Metro Manila para sa proyektong pang-imprastraktura at urban development, kasunod ng pagkawala ng mahigit 600 puno sa Lungsod ng Maynila.
Ayon sa grupo, hindi simpleng usapin ng kapaligiran ang pagkawala ng mga malalaking puno kundi isang usapin ng katarungang pangklima, pampublikong kalusugan, at dignidad ng mamamayan, lalo na sa gitna ng matinding init, pagbaha, polusyon sa hangin, at kakulangan ng mga pampublikong luntiang espasyo sa kalakhang lungsod.
Binigyang-diin ng LLS Philippines na hindi agad mapapalitan ng mga punla ang 617 malalaking puno na pinutol dahil aabutin pa ng maraming taon bago maibalik ng mga ito ang parehong benepisyong naibibigay ng ganap nang lumaking mga puno sa kalikasan at komunidad.
“Seedlings are future possibilities. Mature trees are present protection. Established trees already provide critical ecosystem services: cooling urban temperatures, absorbing floodwaters, filtering pollutants, storing carbon, reducing stress, supporting biodiversity, and creating more humane and livable public spaces,” pahayag ng LLS Philippines.
Nauna nang sinabi ng Department of Environment and Natural Resources (DENR) na may pahintulot ang pagputol ng 617 puno para sa Southern Access Link Expressway (SALEx) project ng San Miguel Corporation, na magdurugtong sa Skyway patungong Roxas Boulevard.
Iginiit din ng grupo na dapat kilalanin ang mga puno sa lungsod bilang mahalagang buhay na imprastraktura para sa pag-angkop at katatagan laban sa epekto ng pagbabago ng klima, at hindi bilang sagabal sa kaunlaran.
Dagdag pa ng LLS Philippines na hindi dapat sinusukat ang tunay na pag-unlad sa lawak ng mga kalsada at expressway habang lalong umiinit, sumisikip, at nagiging hindi makatao ang pamumuhay sa lungsod.
Nanawagan naman ang grupo sa pamahalaan na paghiwalayin ang tungkulin ng Department of Environment and Natural Resources (DENR) sa regulasyon at pangangalaga sa kalikasan upang matiyak na hindi isinasakripisyo ang kalikasan sa pag-apruba ng mga proyekto.
“The future of Manila will not only be defined by what is built, but by what society chooses to protect,” ayon sa LLS Philippines.
Nakasaad sa ensiklikal na Laudato Si’ ni Pope Francis na ang kalikasan ay hindi hiwalay sa tao at hindi lamang dapat ituring bilang simpleng lugar na tinitirhan.
Nanawagan din ang AKKaP ng pananagutan, transparency, at tunay na pangangalaga sa kalikasan sa lahat ng mga proyektong pangkaunlaran.
“Walang sustainable na kinabukasan kung patuloy nating pinuputol ang mismong nagbibigay-buhay sa atin,” ayon pa sa AKKaP.
