7,469 total reads
Hinimok ni Cebu Archbishop Alberto Uy ang mga mananampalataya na makiisa sa White Ribbon Movement bilang pagpapahayag ng pananampalatayang nakaugat sa katotohanan, pananagutan, katarungan, at matuwid na pamamahala.
Sa inilabas na pastoral appeal, inanyayahan ng arsobispo ang lahat ng mga mananampalataya sa arkidiyosesis na magsuot ng puting damit o maglagay ng puting laso sa pagdalo sa mga banal na misa sa June 28 bilang pakikiisa sa White Ribbon Movement March na inorganisa ng iba’t ibang religious groups at inendorso ng Catholic Bishops’ Conference of the Philippines.
Ayon kay Archbishop Uy, ang puting laso ay hindi lamang simbolo ng pagkakaisa kundi isa ring panawagan sa pananagutan.
“The white ribbon symbolizes our hope for a nation free from corruption and dishonesty,” ayon kay Archbishop Uy.
Binigyang-diin ni Archbishop Uy na ang kampanya ay nagsusulong ng pananagutan ng mga lingkod-bayan at wastong pangangasiwa sa pondo ng bayan para sa kapakanan ng mamamayan.
“It expresses our call for accountability from those entrusted with public office, the responsible stewardship of public resources, and the pursuit of truth and justice for the common good,” pahayag ni Archbishop Uy.
Paalala ng arsobispo na hindi lamang mga institusyon ang dapat magbago, kundi ang bawat mamamayan ay inaanyayahang aktibong makilahok sa mga reporma sa lipunan na sisimulan sa sarili.
“At the same time, it reminds us that genuine reform begins not only in our institutions but also in our own hearts,” aniya.
Hinimok din ni Archbishop Uy ang mga pamilya, paaralan, tanggapan, negosyo, at iba pang institusyon na maglagay ng puting laso sa kanilang mga tahanan, sasakyan, gusali, at mga opisina bilang pagpapakita ng suporta sa pagsusulong ng integridad, transparency, at mabuting pamamahala.
Apela rin ng arsobispo ang patuloy na paninindigan para sa katotohanan, kahit matapos ang nakatakdang pagkilos sa June 28.
“Beyond June 28, let us continue to exercise critical discernment, seek the truth, reject misinformation, resist every form of corruption, and hold ourselves and our leaders accountable,” saad ni Archbishop Uy.
Dagdag pa ng pastol, bilang mga Kristiyano at responsableng mamamayan, tungkulin ng bawat isa na maging saksi sa katapatan, katarungan at integridad sa pang-araw-araw na pamumuhay.
Umaasa rin ang arsobispo na sa pamamagitan ng sama-samang panalangin at pagkilos ay mapalalakas ang hangarin ng mamamayan para sa isang bansang pinaghaharian ng katotohanan at katarungan.
“Let us also pray fervently that God may purify our hearts and renew our nation in truth, justice, and love,” pagtatapos ni Archbishop Uy.
Kabilang sa mga manguna sa pagkilos ang Inter-Religious Leaders Council for National Transformation (IRLCNT) kung saan inaasahan ang pagbubuklod ng 50 na organisasyon para sa panawagang wakasan ang mga kaguluhan, kawalang-katarungan, at katiwaliang nagaganap sa lipunan.
