4,952 total reads
Pinalawak ng St. Catherine of Alexandria Parish Church sa Pagbilao, Quezon ang paggamit ng renewable energy bilang bahagi ng pagtugon sa panawagan ng Simbahan na pangalagaan ang kalikasan at mabawasan ang epekto ng climate change.
Sa isang pahayag, inanunsyo ng pamunuan ng parokya, sa pangunguna ni Msgr. Noel Villareal, ang paglalagay ng bagong 10-kilowatt on-grid solar power system sa kumbento upang mapalawak ang paggamit ng malinis na enerhiya.
“As another step in our parish’s commitment to care for our common home, we have installed a 10 kW on-grid solar power system for the rectory. This more than meets the energy requirements of our two newly installed office air-conditioning units and other operations,” pahayag ng pamunuan ng St. Catherine of Alexandria Parish Church.
Dagdag pa nito, ang bagong pasilidad ay karagdagan sa umiiral nitong 5-kilowatt on-grid solar system sa kumbento at 10-kilowatt hybrid solar system sa mismong simbahan.
Ayon sa mga opisyal, inaasahang makatutulong ang paggamit ng renewable energy upang mabawasan ang gastusin sa kuryente at mailaan ang mas malaking bahagi ng pondo sa mga gawaing pastoral at mga programang panlipunan ng simbahan.
“By relying more on clean, renewable energy, we reduce electricity costs and free up more resources for the Church’s pastoral and social ministry,” ayon sa pahayag.
Binigyang-diin din ng pamunuan na mahalagang salik sa kanilang desisyon ang lumalaking banta ng El Niño at nagbabagong klima na patuloy na nakaaapekto sa mga pamayanan.
Ayon pa sa parokya, ang paggamit ng solar energy ay isang konkretong tugon sa panawagan ni Pope Francis sa ensiklikal na Laudato Si’ na isulong ang pangangalaga sa kalikasan at responsableng pangangasiwa sa sangnilikha.
“Caring for creation is not only an environmental responsibility—it is an act of Christian stewardship,” giit ng parokya.
Kaakibat din ito ng pagsusulong ng Simbahang Katolika sa paggamit ng mas malinis na pinagkukunan ng enerhiya sa gitna ng mga pangamba sa epekto ng mga coal-fired power plant sa kapaligiran.
Matatagpuan sa Quezon ang ilang coal-fired power facilities kabilang ang mga planta sa Mauban at Pagbilao, habang nakatakda rin ang isang panukalang 1,200-megawatt coal-fired power project sa bayan ng Atimonan.
