3,850 total reads
Nagpahayag ng pakikiisa at suporta si Tarlac Bishop Roberto Mallari kay Bayombong Bishop Jose Elmer Mangalinao kaugnay ng kinakaharap nitong kaso dahil sa pagtutol sa mining exploration activities sa Kasibu, Nueva Vizcaya.
Sa kanyang mensahe, pinuri ni Bishop Mallari ang matatag na paninindigan ni Bishop Mangalinao sa pagsusulong ng pangangalaga sa kalikasan at pagtatanggol sa karapatan ng mga lokal na pamayanan na maaaring maapektuhan ng mga proyekto sa pagmimina.
Ayon kay Bishop Mallari, ang adbokasiya ni Bishop Mangalinao ay sumasalamin sa tunay na servant leadership at sa malalim na pananagutan ng Simbahan na pangalagaan ang “common home” o ang sangnilikha ng Diyos.
Kasabay nito, tiniyak ng obispo ang kanyang panalangin para sa katarungan, lakas, at patuloy na pag-iingat kay Bishop Mangalinao habang kinakaharap nito ang mga hamon.
“I stand firmly with Bishop Mangalinao in his courageous stand against mining exploration in Kasibu, Nueva Vizcaya. His advocacy to protect the environment and the rights of local communities reflects true servant leadership and a deep commitment to our common home. We pray for justice, strength, and protection for him as he faces these challenges,” ayon sa mensaheng pinadala ni Bishop Mallari sa Radyo Veritas.
Kamakailan ay kinasuhan si Bishop Mangalinao kasama ang iba pang environmental advocates kaugnay ng kanilang pagtutol sa exploration activities ng North Luzon Minerals Resources Corporation sa loob ng Bugkalot/Ilongot ancestral domain sa Kasibu, Nueva Vizcaya.
Patuloy namang lumalawak ang suporta ng mga lider ng Simbahang Katolika para sa obispo na naninindigan para sa pangangalaga ng kalikasan at kapakanan ng mga apektadong komunidad.
