12,848 total reads
Ipinawalang-bisa ng Kasibu Municipal Trial Court ang kasong isinampa laban kay Bayombong Bishop Jose Elmer Mangalinao at iba pang mga tagapagtanggol ng kalikasan na tumututol sa mga aktibidad ng pagmimina sa Nueva Vizcaya.
Sa inilabas na pahayag, nagpasalamat si Bishop Mangalinao sa naging pasya ng hukuman at sa mga nagpahayag ng suporta at panalangin sa kanilang hanay sa gitna ng kinaharap na legal na usapin.
Ayon sa obispo, ang desisyon ay hindi lamang tagumpay sa larangan ng batas kundi tagumpay rin para sa katotohanan, katarungan, at sama-samang pagkilos ng mga komunidad na nagsusulong ng pangangalaga sa kalikasan.
“We are deeply grateful for your prayers, solidarity, encouragement, and unwavering support throughout this challenging journey. You reminded us that we were never alone,” pahayag ni Bishop Mangalinao.
Nag-ugat ang kaso sa pagtutol ng mga residente, environmental advocates at mga lider ng Simbahan sa mining exploration activities sa Kasibu, Nueva Vizcaya na pinangangambahang magdulot ng banta sa mga watershed, kalikasan at kabuhayan ng mga komunidad.
Nagpasalamat din si Bishop Mangalinao sa mga abogadong nagbigay ng libreng serbisyong legal at tumulong sa pagtatanggol sa kanilang adbokasiya para sa environmental justice at kapakanan ng mga mamamayan.
Binigyang-diin ng obispo na wala silang hinanakit laban sa sinuman at mananatili silang nakatuon sa mapayapang pagsusulong ng pangangalaga sa kalikasan.
Iginiit din ni Bishop Mangalinao na ang pagtatanggol sa mga watershed, kalikasan at kabuhayan ng mamamayan ay hindi isang krimen kundi isang moral na pananagutan ng lahat.
“The struggle continues, but today we pause to thank God and all who stood with us our families, communities, Indigenous peoples, Church leaders, friends, supporters, benefactors, environmental advocates, the faithful and every supporter who believed in our cause,” ayon kay Bishop Mangalinao.
Patuloy namang nananawagan ang obispo ng pagkakaisa para sa pangangalaga sa mga watershed ng Nueva Vizcaya at Quirino para sa buhay, kabuhayan at kapakanan ng mga susunod na henerasyon.
