5,536 total reads
Nanindigan ang Diocese of Laoag laban sa planong pagtatayo ng malawakang offshore wind projects sa karagatan ng Burgos, Bangui, at Pagudpud sa Ilocos Norte, dahil sa posibleng epekto nito sa kabuhayan ng maliliit na mangingisda at sa kalikasan.
Sa liham-sirkular na “Defending Our Common Home“, inihayag ni Laoag Bishop Renato Mayugba na bunga ng pakikinig, panalangin, at pagninilay kasama ang mga apektadong komunidad ang naging paninindigan ng diyosesis.
Ayon sa obispo, bagama’t kinikilala ng Simbahan ang kahalagahan ng renewable energy, hindi ito dapat isulong kapalit ng kapakanan ng mahihirap at ng pagkasira ng kalikasan.
“True ecological conversion demands that the pursuit of green energy must not come at the expense of the poor and the destruction of our local environment,” ayon kay Bishop Mayugba.
Binigyang-diin ng diyosesis na ang tunay na pangangalaga sa kalikasan, ayon sa diwa ng Laudato Si’, ay dapat isaalang-alang ang katarungang panlipunan at ang panawagang pakinggan kapwa ang hinaing ng daigdig at ng mahihirap.
Nagbabala rin si Bishop Mayugba na maaaring maapektuhan ang kabuhayan ng mahigit 6,500 mangingisda sa mga bayan ng Pasuquin, Burgos, Bangui, at Pagudpud dahil sa planong pagtatatag ng permanenteng 50-meter no-sail zones sa paligid ng mga wind turbine, na maglilimita sa kanilang tradisyunal na pangingisdaan.
“True human development cannot be built on the backs of marginalized coastal communities for the benefit of distant investors,” saad ni Bishop Mayugba.
Ipinahayag din ng obispo ang pagtutol sa anumang proyektong maaaring magdulot ng pinsala sa yamang-dagat, kabilang ang pagkasira ng mga marine habitat at pag-abala sa biodiversity dulot ng konstruksyon ng mga pundasyon ng wind turbines sa ilalim ng dagat.
Iginiit ng diyosesis na ang dagat, hangin, at lupain ng Ilocos Norte ay hindi maaaring ituring na kalakal kundi isang banal na pamana na dapat pangalagaan para sa susunod na henerasyon.
Nanawagan din si Bishop Mayugba sa mga opisyal ng pamahalaan, environmental scientists, mga institusyong pang-edukasyon, kabataan, mangingisda, at iba pang sektor na magkaisa sa pangangalaga sa karagatan at tiyaking ang tunay na kapakanan ng tao at kalikasan ang mananaig kaysa sa interes ng malalaking negosyo.
“Let our collective voice echo across the waves of Bangui Bay, from the shores of Burgos to the hills of Pagudpud.
We will defend our waters, we will protect our poor, and we will preserve our future,” panawagan ni Bishop Mayugba.
