420 total views
Ikinabahala ni San Carlos Bishop Gerardo Alminaza, pangulo ng Caritas Philippines, ang pagkawala ng humigit-kumulang 700 ektarya ng humid primary forest sa Negros Occidental mula 2002 hanggang 2025, batay sa pinakahuling datos ng Global Forest Watch.
Ayon kay Bishop Alminaza, hindi dapat maliitin ang pagkawala ng mga sinaunang kagubatang nabuo sa loob ng daan-daan hanggang libu-libong taon dahil hindi na ito basta maibabalik.
“Once they are lost, they cannot simply be replanted within our lifetime,” pahayag ni Bishop Alminaza.
Ipinaliwanag ng obispo na ang mga primary forest ay mahalaga bilang tahanan ng iba’t ibang uri ng buhay, pinagkukunan ng malinis na tubig, panangga laban sa pagbaha at pagguho ng lupa, at tagasipsip ng carbon na nakatutulong sa pagharap sa climate change.
Sinabi ni Bishop Alminaza na ang pagkawala ng mga kagubatan ay dulot ng pagpapalawak ng agrikultura, hindi napapanatiling pagtotroso, pagmimina at quarrying, pagpapatayo ng imprastraktura, mga sunog sa kagubatan, at lumalalang epekto ng climate change.
Aniya, pinalalala pa ito ng mahinang pagpapatupad ng mga batas pangkalikasan, katiwalian, hindi maayos na land-use planning, at kaunlarang inuuna ang panandaliang tubo kaysa sa kabutihang panlahat.
“This is why protecting our forests is not an obstacle to authentic development. It is a necessary condition for development that is just, sustainable, and life-giving,” saad ni Bishop Alminaza.
Dahil dito, nanawagan ang obispo ng mas mahigpit na pangangalaga sa mga natitirang kagubatan at mas responsableng pamamahala sa likas na yaman.
Binigyang-diin din ni Bishop Alminaza na ang tao ay hindi may-ari kundi katiwala lamang ng kalikasan, kaya’t ang pagpapabaya rito ay hindi lamang pagkabigo sa pangangalaga sa kapaligiran kundi maging sa moral at espirituwal na pananagutan.
Hinimok naman ng obispo ang iba’t ibang sektor ng lipunan na isulong ang ecological conversion at sama-samang pangalagaan ang kalikasan bilang kaloob ng Diyos para sa kasalukuyan at sa susunod na mga henerasyon.
“For the forests we protect today are the hope, security, and inheritance of tomorrow. Our forests are God’s gift. Our stewardship is our sacred responsibility,” ayon kay Bishop Alminaza.
