7,848 total reads
Natuklasan ng mga mananaliksik mula sa University of the Philippines (UP) at National Central University sa Taiwan ang apat na bagong fault zone sa ilalim ng karagatan sa kanlurang bahagi ng Luzon na makatutulong sa pagpapalawak ng kaalaman sa mga panganib ng lindol at tsunami sa bansa.
Batay sa pag-aaral na inilathala sa Journal of Asian Earth Sciences, ang apat na fault zone ay pinaniniwalaang mga sangay ng Philippine Fault Zone, isa sa mga pangunahing fault system na may kaugnayan sa paggalaw ng lupa at pagyanig sa Pilipinas.
Gamit ang high-resolution seafloor maps at seismic profiles, natukoy ng mga mananaliksik ang mga fault sa ilalim ng dagat sa kanluran ng Luzon, kabilang ang isang fault branch na posibleng direktang nakakonekta sa Manila Trench, isang malalim na trench sa West Philippine Sea sa kanlurang bahagi ng Luzon na maaaring pagmulan ng malalakas na lindol at tsunami.
Natuklasan din sa pag-aaral na nagkakaroon ng tinatawag na slab tearing o pagkakabiyak ng lumulubog na tectonic plate sa ilalim ng Central Luzon, na iniuugnay sa magkasabay na paggalaw ng Palawan Microcontinental Block at Benham Rise.
Ayon sa mga mananaliksik, mahalaga ang pagkakatukoy sa mga bagong fault zone upang higit na mapahusay ang pagtataya sa mga seismic hazard at mapalakas ang paghahanda ng mga pamayanan laban sa posibleng malalakas na lindol at tsunami sa hinaharap.
Patuloy namang ipinapanalangin ng simbahan ang kaligtasan ng bawat pamayanan at ang pagkakaroon ng karunungan upang mapaghandaan at mabawasan ang epekto ng mga kalamidad.
