234 total views
Hiniling ng House prosecution panel sa Senate Impeachment Court na maglabas ng subpoena laban kay Atty. Zuleika Lopez, chief of staff ni Vice President Sara Duterte, upang humarap bilang testigo sa impeachment trial.
Ayon sa prosekusyon, mahalaga ang testimonya ni Lopez sa pagpapatibay ng Article IV ng Articles of Impeachment, na tumutukoy sa grave threats laban kina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez.
Bukod sa pagbibigay ng testimonya, inaasahan ding makatutulong si Lopez sa pagtukoy at pagpapatunay sa mga dokumento at iba pang ebidensyang ihaharap ng prosekusyon sa impeachment court.
Bukod kay Zuleika, nais ding ipa-subpoena ng prosecution panel National Bureau of Investigation (NBI) Director Melvin Matibag.
Inaasahang ilalahad ni Matibag ang resulta ng imbestigasyon ng NBI kaugnay ng mga pahayag ng Bise Presidente, kabilang ang mga ebidensyang nakalap at ang naging batayan ng ahensya sa pagsasagawa ng pormal na imbestigasyon.
Ayon pa sa House prosecutors, makatutulong din ang NBI Director sa pagpapatunay sa mga dokumento at digital evidence na ihaharap sa impeachment court.
Sa pahayag, nais ng prosekusyon na dumalo si Zuleika at Matibag sa mga pagdinig na nakatakda sa July 13, 14, at 15.
Sakaling pahintulutan ng impeachment court ang kahilingan, magiging pangunahing testigo sina Zeleika at Matibag ng House prosecution sa pagtalakay ng Article IV ng Articles of Impeachment.
