247 total views
Nanawagan si Fr. Edwin Gariguez, social action director ng Diyosesis ng Calapan, na pabilisin ang paglipat ng Oriental Mindoro sa renewable energy upang matugunan ang mataas na singil sa kuryente at madalas na brownout sa lalawigan.
Sa inilabas niyang pag-aaral na Powering a Province in the Dark: Oriental Mindoro’s Energy Paradox and the Urgent Case for a Renewable Future, sinabi ni Fr. Gariguez na umaabot sa tinatayang 310 milyon hanggang 376 milyong piso ang buwanang ibinabayad ng mga konsyumer sa kuryente sa kabila ng hindi matatag na suplay.
Ayon sa pari, mahigit 73 porsiyento ng suplay ng kuryente ng Oriental Mindoro Electric Cooperative (ORMECO) ay mula sa diesel-fired generation, na mas mahal kaysa renewable energy.
“The implication is difficult to ignore: Mindoreños are paying premium prices for electricity generated from some of the most expensive energy sources available,” pahayag ni Fr. Gariguez.
Binigyang-diin ni Fr. Gariguez na tinatayang 320 beses na mas mataas ang renewable energy potential ng Mindoro kaysa sa inaasahang peak electricity demand ng lalawigan ngayong 2025.
“Renewable energy is no longer simply an environmental option. It has become the most practical economic solution available,” ayon sa pari.
Ibinahagi rin ni Fr. Gariguez na gumagamit na ng rooftop solar systems ang ilang komunidad ng mga Mangyan at mga parokya bilang bahagi ng pagsusulong ng ecological conversion at climate justice.
Iginiit ng pari na dapat umasa ang kinabukasan ng Oriental Mindoro sa malinis na enerhiyang nagmumula sa araw, hangin, at mga ilog sa halip na sa inaangkat na diesel fuel.
“The future of Mindoro need not be powered by imported, expensive and dirty energy. It can be powered by the sunlight that bathes its mountains, the winds that sweep across its coasts, the rivers that descend from Mt. Halcon, and the collective determination of its people,” giit ni Fr. Gariguez.
