10,910 total reads
Iginiit ni Bayay Sibuyanon chairperson Rodne Galicha na may ganap na kapangyarihan ang Sangguniang Bayan ng San Fernando, Romblon na tanggihan ang kahilingan ng Altai Philippines Mining Corporation (APMC) para sa municipal endorsement kung hindi nito matutugunan ang mga umiiral na lokal na polisiya, batas pangkalikasan at geohazard frameworks.
Ito ang binigyang-diin ni Galicha matapos siyang dumalo bilang resource person sa Committee of the Whole hearing ng Sangguniang Bayan na tumalakay sa kahilingan ng APMC para sa kinakailangang pag-endorso ng lokal na pamahalaan sa planong pagmimina sa bayan.
Aniya, malinaw sa desisyon ng Korte Suprema na may awtoridad ang mga local government unit na suriin ang bawat mining application at hindi obligadong magbigay ng endorsement kung hindi natutugunan ng proyekto ang mga lokal na polisiya at iba pang lehitimong konsiderasyon.
“The High Court clarified that local government units have the independent authority to evaluate each individual mining application, express their concerns or objections thereto, and withhold their approval if these concerns are not addressed,” pahayag ni Galicha.
Binigyang-diin din ni Galicha na ang posibleng pagtanggi ng Sangguniang Bayan ay hindi maituturing na ‘grave abuse of discretion’ dahil nakabatay ito sa mahigit dalawang dekadang magkakasunod na mga resolusyon ng pamahalaang bayan at mga barangay, gayundin sa 2022 Comprehensive Land Use Plan ng San Fernando na nagpapakita ng matatag na pagtutol sa pagmimina sa isla.
Dagdag pa nito, hindi dapat hadlangan ng banta ng posibleng demanda ang malayang pagpapasya ng mga halal na opisyal habang nagpapatuloy pa lamang ang kanilang pagtalakay sa usapin.
“The burden lies entirely on the mining corporation to prove that its project satisfies the town’s zoning mandates, environmental laws, and geohazard frameworks,” ayon kay Galicha.
Iginiit pa ni Galicha na sakaling magpasya ang Sangguniang Bayan na hindi iendorso ang proyekto bilang pangangalaga sa kalikasan at kapakanan ng mamamayan, ito ay ganap na naaayon sa kapangyarihang ipinagkaloob sa mga lokal na pamahalaan sa ilalim ng Local Government Code, habang nasa kumpanya ang pagpapasya kung hahamunin nito sa hukuman ang magiging desisyon ng konseho.
Nanawagan si Galicha sa mamamayan ng Sibuyan na patuloy na suportahan ang kanilang mga lokal na lider sa pagtatanggol sa kalikasan at igalang ang demokratikong proseso sa pagdedesisyon hinggil sa mga proyektong may malaking epekto sa komunidad.
Kaakibat nito ang patuloy na paalala ng Simbahan, lalo na sa diwa ng Laudato Si’, na ang pangangalaga sa kalikasan ay isang pananagutang moral at pagpapahayag ng pag-ibig sa Diyos, sa kapwa, at sa mga susunod na henerasyon.
