16,555 total reads
Iniutos ng Senate Impeachment Court ang pagpapalabas ng subpoena para sa dalawang dating opisyal ng Land Bank of the Philippines na haharap bilang mga testigo sa pagpapatuloy ng impeachment trial ni Vice President Sara Duterte sa July 29.
Kabilang sa ipapatawag sina Violeta Constantino, dating branch manager ng Landbank-Shaw Boulevard sa Mandaluyong City, at Nenita Camposano, dating manager ng Landbank Department of Education branch.
Ihahain ng House prosecution panel ang kanilang testimonya kaugnay ng Article 1 ng Articles of Impeachment na tumatalakay sa sinasabing maling paggamit ng kabuuang P612.5 milyong confidential at intelligence funds ng Office of the Vice President at Department of Education noong panahon na pinamunuan ni Duterte ang dalawang tanggapan.
Ayon kay House lead prosecutor at Batangas Rep. Geville Luistro, unang haharap si Constantino bago si Camposano sa pagdinig sa susunod na linggo.
Ang nasabing pondo ay binubuo ng P500 milyon para sa Office of the Vice President at P112.5 milyon para sa Department of Education.
Sa mga pondong ito, sinabi ng prosekusyon na malaking bahagi ang kinuwestiyon ng Commission on Audit. Kabilang dito ang P448 milyon na hindi pinayagan ng COA, habang may P73 milyon na idineklarang final at kailangang maibalik sa pamahalaan ng mga itinuturing na responsable.
Iniulat din ng COA na naubos ang kabuuang P112.5 milyong confidential funds ng DepEd sa loob lamang ng 11 araw.
Ipinakita rin ng prosecution ang mga resulta ng pagsusuri mula sa Philippine Statistics Authority na nagsasabing ilan sa mga nakalistang benepisyaryo ng pondo ay walang rekord sa kanilang database.
Samantala, iniulat naman ng National Bureau of Investigation na may mga pagkakatulad sa mga lagda sa mga acknowledgement receipt ng sinasabing mga tumanggap ng pondo, na maaaring indikasyon na iisang tao lamang ang gumawa ng ilang pirma.
Inaasahang magiging bahagi ng testimonya nina Constantino at Camposano ang paglilinaw sa proseso ng pagpapalabas at pagproseso ng mga pondong ginagamit bilang batayan ng unang artikulo ng impeachment laban kay Vice President Duterte.
