24,477 total reads
Hinikayat ni Antipolo Bishop Ruperto Santos ang mga mananampalataya na kilalanin at unahin ang Diyos, kasabay ng paggunita sa kapistahan ni Santa Rosa de Lima sa Saint Rose of Lima Parish sa Teresa, Rizal.
Ayon kay Bishop Santos, mahalagang tularan sa buhay ni Santa Rosa ang pagkilala sa kapangyarihan ng Diyos at ang pagkilala na ang kagandahan, kakayahan at anumang biyayang tinatanggap ng tao ay nagmumula sa Panginoon.
Binigyang-diin ng Obispo na hindi dapat gamitin ng tao ang kanyang mga kakayahan para lamang sa sarili, kundi para sa ikaluluwalhati ng Diyos, paglilingkod sa kapwa at pagiging kasangkapan ng kabutihan.
“Unahin po natin ang Diyos. At yung ating natanggap, yung ating kagandahan, kagalingan, kapangyarihan, gamitin po natin para sa Diyos. Gamitin po natin ang ating kakayahan upang tayo ay maging kasangkapan ng kabutihan at mapabuti ang buhay. Magmalasakit po tayo sa ating kapwa at sa ating pagmalasakit, ipakita pa natin ang ating pag-ibig,” ayon sa panayam ng Radyo Veritas kay Bishop Santos.
Hinimok din ni Bishop Santos ang mga mananampalataya na isabuhay ang pagmamalasakit sa bayan, kalikasan at kapwa, kasunod ng halimbawa ni Santa Rosa na handang magpakasakit at magmahal para sa iba.
Ayon sa Obispo, nawa katulad ni Santa Rosa, sa gitna ng mga pagsubok, mahalagang isipin ang Diyos, ang kapwa at ang sarili, dahil ang Diyos ang patuloy na magtataguyod at magtatanggol sa mga taong nagtitiwala sa Kanya.
“Ang Diyos ang magtataguyod sa atin, ang Diyos ang magtatanggol sa atin, ang Diyos ang bahala sa atin. At sa Diyos may kaligtasan, may kasagutan, may kagalingan. Isipin po natin ang Diyos, isipin natin ang kapwa at ating sarili. Sa panahong ito, kailangan natin magmalasakit,” ayon pa sa panayam ng Radyo Veritas kay Bishop Santos.
Si Santa Rosa de Lima, na ipinanganak bilang Isabel Flores de Oliva sa Peru noong 1586, ay nakilala sa kanyang buhay ng pananalangin, pagtulong sa mga mahihirap at pag-aalaga sa mga maysakit at walang tahanan, bago pumanaw noong August 24, 1617 sa edad na 31.
Bilang unang taong isinilang sa Amerika na idineklarang santo ng Simbahang Katolika, naging huwaran si Santa Rosa ng paglilingkod at sakripisyo, at idineklara siyang santo ni Pope Clement X noong 1671, si Santa Rosa De Lima rin ang kinikilalang ikalawang Patrona ng Pilipinas.
