295,110 total reads
Kapanalig, kung normal na sa bansa natin ang corruption na kinasasangkutan mismo ng mga halal na opisyal at pinuno ng mga ahensiya ng pamahalaan, tila normal na o kalakaran na rin na ma-oospital muna bago makulong o kaya magkakasakit ang isang opisyal ng gobyerno kapag nadakip na at ikinulong.
Kaya walang nangyayaring malaking pagbabago, tila naging kultura na ang katiwalian at korapsyon sa alinmang sangay ng pamahalaan, sa halos lahat ng local government units., sa hudikatura… sa lehislatura… at sa ehekutibo. Sa harap ng katotohanang ito Kapanalig, ginagawa na ring sistema ng mga inaakusahan ng katiwalian., nang plunder na magsakit-sakitan. Para ano Kapanalig? Bakit? Para makuha ang ating simpatya, upang makuha ang ating suporta.
Nasaksihan na natin ang paulit-ulit na drama ng pagkakasakit sa tuwing aarestuhin o makukulong na. Ginawa na ito ni dating Pangulong Joseph Estrada, nahatulan na guilty sa kasong pandarambong, dahil sa humanitarian reason, ipina-house na lamang. Si dating pangulong Gloria Macapagal Arroyo, nagkasakit din nang ikukulong na., hindi tulad ni Erap, si GMA na-hospital arrest naman.
Lahat na lang nagkakasakit, si dating Senador Bong Revilla, nagkasakit din nang makulong sa kasong pandarambong. Si incumbent Senator Marcoleta, nagkasakit din, dinala sa PNP ospital., nadiskubre ng Sandiganbayan, nagsakit-sakitan lang. Kakaiba naman si dating Ako Bicol partly-list representative Zaldy Co, nagbitiw na congressman nang madawit sa flood control projects dahil magpapagamot, nakatakas sa Pilipinas at hindi na mahuhuli nang mga otoridad para litisin sa kasong plunder.
Habang ang sinasabing kasabwat ni Co, si dating house speaker Martin Romualdez, bago maglabas ng arrest warrant ang Sandiganbayan, nagpaospital na., ang dahilan, tumaas ang blood pressure dahil arrestuhin na at ikukulong.
Kapanalig, likas at ugali nating mga Pilipino na maunawain., mapagpatawad., ang gawing ito ang pinagsasamantalahan ng mga korap na pulitiko, mga tiwaling opisyal ng gobyerno. Kasi tayong mga Pilipino, lantaran nang winawalanghiya, lantaran nang niloloko, lantaran nang niyuyurakan ang dangal., sa pamamagitan lang ng drama-draman, sa pamamagitan lang pagsakit-sakitan., sa pamamagitan lang ayuda., tayo ay magpapatawad, tayo ay nagiging makakalimutin., nakalimutan na natin ang ginawang kahayupan, ang ginawang mali ng mga korap na pulitiko., nang mga ganid na opisyal ng pamahalaan. Ang masakit na gawi nating mga Pilipino, ang loyalty! Kahit sandamukal na ebidensiya ang iharap sa ating parokyanong pulitiko, pilit pa rin nating ipinagtatanggol.
Ang nakakatawa at nakakainis Kapanalig, ang lakas ng loob ng mga walanghiyang opisyal na ito ng pamahalaan sa pagnanakaw sa pera nating mga Pilipino. Da-dramahan na naman tayo, magsasakit-sakitan na naman kapag nabuko ang ginawang kabulastugan. Kapanalig, paloloko na naman ba tayo? Maaawa na naman ba tayo?
Kapanalig, hindi ba naaantig ang ating konsensiya sa sinasabi ni Pasig City Mayor Vico Sotto, “Parang nakarating na tayo sa punto kung saan mas nakakagulat pa kapag may makasalubong kang “honest” kaysa corrupt”.
Sana man lang Kapanalig, matuto tayo sa sinasabi ng Luke 12:48 – “From everyone who has been given much, much will be demanded; and from the one who has been entrusted with much, much more will be asked.”
Sumainyo ang Katotohanan.
