595 total reads
Pinaghahandaan na ng Catholic Bishop’s Conference of the Philippines (CBCP) – Episcopal Commission on Youth ang nakatakdang National Youth Day na isasagawa sa ika-6 hanggang ika-10 ng Nobyembre sa Zamboanga City.
Ayon kay Rev. Fr. Conegundo Garganta – Executive Secretary ng kumisyon, inaasahang aabot sa 3,500 ang mga delegadong makikiisa sa nakatakdang pagtitipon mula sa 86 na mga diyosesis sa buong bansa at sa Federation of National Youth Organizations.
“The Zamboanga City and Archdiocese of Zamboanga will be hosting the National Youth Day 2017 from November 6 to 10 this is their response to the invitation of the Episcopal Commission on Youth to welcome young people from all the 86 Dioceses and from the Federation of National Youth Organization na matipon ang mga kabataan dito bilang paraan din ng kanilang pagpapakita at pagsaksi bilang isang kabataang may pananampalataya…” pahayag Father Garganta sa panayam sa Radio Veritas.
Tiniyak ni Father Garganta katuwang ang Archdiocese of Zamboanga sa pangunguna ni Archbishop Romulo Dela Cruz na host ng pagtitipon ang seguridad at kaligtasan ng mga delegado partikular na sa patuloy na pag-iral ng Martial Law sa rehiyon ng Mindanao.
“The Archdiocese of Zamboanga is giving us the assurance that the condition of the situation in Marawi there may be a conflict it shouldn’t hinder people, especially young people with their Bishop and diocesan or youth director, priest director and the religious leaders na mangilag o matakot para magpatuloy na makilahok para sa pagdiriwang ng National Youth Day dito sa Archdiocese of Zamboanga…” Dagdag pa ni Fr. Garganta.
Kaugnay nito umaasa rin ang Pari na magiging matapang ang mga kabataan sa pagsaksi at pakikiisa sa anumang hamong kinahaharap ng kasalukuyang panahon na hindi basta nadadaig o nagpapatakot sa banta ng panganib.
Samantala, inihayag rin ni Fr. Garganta na buo na ang plano kaugnay sa pagsasagawa ng National Youth Day sa Zamboanga City bago pa man magkaroon ng kaguluhan sa Marawi City kung saan hanggang sa ika-31 ng Disyembre ay saklaw ng umiiral na Martial Law ang 25 lalawigan at 27 lungsod ng Mindanao na may tinatayang aabot sa 30-milyong populasyon na karamihan o mayorya ay mga Muslim kung saan mayroon ring aabot sa 20 arkidiyosesis at diyosesis ang Simbahang Katolika.
