329 total views
Pangungunahan ng Diocese of San Pablo Laguna ang Laudato Si Pre Conference bilang paghahanda sa gaganaping kumperensya ng Ecclesiastical Province of the Archdiocese of Manila sa susunod na taon.
Sa ilalim ng temang “Mapangalagang Sambayanan sa Inang Kalikasan”, isasagawa ng Diocese of San Pablo ang kumperensya sa Canossa College, San Pablo, simula alas otso ng umaga hanggang alas kuwatro ng hapon ika-25 ng Nobyembre 2017.
Ayon kay Msgr. Jerry Bitoon, Head ng Ecology Ministry of the Diocese of San Pablo, layunin nito na maitanim sa puso ng mga mananampalataya sa Diyosesis ang tamang pag-aaruga sa kalikasan at upang mapalalim din ang pag-unawa ng bawat isa sa encyclical ng Santo Papa na Laudato Si.
Bukod dito, magsisilbing inspirasyon din ang gaganaping kumperensya upang mapalakas ang pagtugon ng simbahan sa mga usaping may kaugnayan sa pagkasira ng kalikasan.
“Gusto naming mapalakas yung ministry dito sa Diocese kasi talagang all these years, mahina, hindi masyadong nabibigyang pansin ang issue ng ecology sa simbahan. Lumabas din yan sa ginawa naming survey na mahina, madalang at ang tawag nila’y napaka tahimik ng simbahan sa issue ng kapaligiran.” Pahayag ni Msgr. Bitoon sa Radyo Veritas.
Itatampok sa kumperensya ang iba’t –ibang panayam kaugnay sa kasalukuyang kalagayan ng kalikasan at ang mga pagkasirang idinulot ng mga tao sa kapaligiran.
Bibigyang diin rin dito ang mahigpit na pagtugon sa environmental laws na ecological solid waste management act, clean air act, at clean water act.
Ang Laudato Si Pre-conference sa Diocese of San Pablo ang ikalaw sa mga serye ng kumperansyang isinasagawa bilang paghahanda sa gaganaping Conference sa ikalawa at ikatlong araw ng Pebrero 2018.
Susundan ito ng ikatlong Pre-conference sa ika-9 ng Disyembre sa Archdiocese of Manila.
Ang Laudato Si ang ikalawang encyclical na nilathala ni Pope Francis kasunod ng Lumen Fidei.
Gayunman, ito ang itinuturing na kauna-unahang encyclical na patungkol sa tamang pangangalaga sa Kalikasan at nag-iwan ito ng tatak sa maraming tao sa kabila ng pagkakaiba-iba ng pananampalataya dahil sa pagtukoy sa isang pandaigdigang suliranin sa kalikasan.
