644 total reads
May 7, 2020-1:10pm
Isang babala at pagpapakita ng kapangyarihan ang mensahe ng pansamantalang pagpapasara ng ABS-CBN ng pamahalaan.
Ayon kay Manila Apostolic Bishop Broderick Pabillo, ito ay nagbabadya ng pagkontrol ng media.
“Gusto nilang magpadala ng message na ‘kami ay powerful at we can control you kaya mag-ingat kayo sa sasabihin nyo,’ so mawawala na ang ‘freedom of expression’ yung mga tao sana sa ibang mga networks natin ay hindi matakot dahi sa pangyayaring ito,” ayon kay Bishop Pabillo.
Paliwanag ng Obispo, bagama’t ang hakbang ay hindi man patungong batas militar ay nagbibigay naman ito ng babala sa marami sa kapangyarihan laban sa mga kakalaban sa gobyerno.
Una na ring nagpalabas ng opisyal na pahayag ang Radyo Veritas 846 bilang paninindigan sa kahalagayan ng ‘Kalayaan ng Pamamahayag’.
Ayon sa Obispo, hindi ito ang unang pagkakataon na ipinakita ng kasalukuyang administrasyon ang kanilang kakayahan laban sa mga kritiko ng gobyerno.
Kabilang na ang pagpapaalis sa Pilipinas kay Australian Missionary Sr. Patricia Fox, at ang pagpapatalsik sa posisyon kay dating Supreme Court chief Justice Maria Lourdes Sereno.
“Kasi ang nakikita po natin, ginagamit ng gobyerno ang batas laban sa tao. Ang batas ay dapat na nandiyan para ipromote ang kalagayan ng bansa. Ngunit nakita po natin ang batas ay ginagamit laban sa kanilang kalaban,” ayon sa obispo.
Naniniwala din ang Obispo na sinadyang hindi palawigin ang prangkisa ng kompanya.
“At itong prangkisang ito ay matagal nang nakalaan and the congress is seating on it,” ayon kay Bishop Pabillo.
Una rin inihayag ng Pangulong Rodrigo Duterte ang kaniyang personal na galit sa himpilan noong nakalipas na halalang pampanguluhan.
