483 total reads
Mariing kinokondena ng Department of Interior and Local Government ang hindi makataong dispersal na ginawa ng Philippine National Police sa mga miyembro ng National Lakbayan of Moro and Indigenous Peoples sa harap ng US Embassy.
Kaugnay nito, nanawagan si DILG Sec. Ismael Sueno ng malinis at patas na imbestigasyon sa ginawang pananagasa ni Police Officer 3 Franklin Kho sa mga katutubong raliyista habang sinusubukan ng mga ito na lumapit sa embahada.
“We call for thoroughness and transparency in the PNP’s probe of the events, and we condemn to the highest degree any violation of public safety, of the rights of the protesters,” pahayag ni Sec. Sueno.
Ayon pa sa kalihim, nakababahala ang ipinakikitang karahasan na ginawa ng mga pulis sa mga video na kumakalat sa social media.
Dagdag pa niya hindi naipatupad ng mga pulis na nakatalaga sa rally ang maximum tolerance at nagdulot ito ng panganib sa buhay ng mga indibidwal.
“In the event that maximum tolerance was not observed and that there was endangerment of human life, the police are to be held fully accountable,” dagdag pa ng kalihim.
Dahil dito, inihayag ni Sec. Sueno na sinusuportahan niya ang ginawang hakbang ni PNP Chief Ronald Dela Rosa matapos nitong isailalim sa restrictive custody sa Camp Bagong Diwa ang 9 na MPD personnel kasama ang kanilang ground commander na si Senior Supt. Marcelino Pedrozo.
Sa kasalukuyan, patuloy namang nagpapagaling ang may 50 indibidwal na sugatan mula sa hanay ng National Lakbayan of Moro and Indigenous People.
