22,743 total reads
Hinimok ng lider ng Caritas Manila ang mga alumni scholars at kasalukuyang scholars na gamitin ang kanilang edukasyon, kakayahan at impluwensiya sa paglilingkod sa kapwa at pagtataguyod ng kabutihan ng lipunan.
Sa 11th General Assembly ng Caritas Manila Alumni Scholars Association o CAMASA, binigyang-diin ni Caritas Manila Executive Director Father Anton CT Pascual ang kahalagahan ng servant leadership o pamumunong nakatuon sa paglilingkod, sa halip na paggamit ng kapangyarihan at awtoridad para sa pansariling interes.
Ayon kay Father Pascual, nakasandig ang servant leadership sa tatlong mahalagang haligi—personal discipline, moral integrity at social responsibility dahil mahalagang patuloy na paunlarin ng isang lider ang kanyang intellectual, physical at mental o emotional well-being habang isinasaalang-alang ang kapakanan at pag-unlad ng kapwa.
Hinimok din ng pari ang mga kabataan na magkaroon ng national consciousness at national conscience, o malalim na malasakit at pananagutan sa bayan.
Kaugnay nito, binigyang-diin niya ang kahalagahan ng critical thinking—ang kakayahang magtanong, magsaliksik at magsuri ng impormasyon at propaganda bago maniwala o gumawa ng desisyon.
“Kasi palaging remember, ‘pag tayo leader, ‘pag sinabing leader, meron kang follower. ‘Pag leader ka, meron kang influence, meron kang authority, meron kang power. Kaya ang problema sa leadership, nakakalasing ang leadership. Kaya mahalaga ang authentic power ay ginagamit para maglingkod. Kaya dapat huwag mong kalimutan kung bakit ka may kapangyarihan, kung bakit ka leader, para mag-serve. ‘Yan ang purpose ng leadership: to serve. At the more you serve, the more you are great before God,” ayon sa mensahe ni Father Pascual para sa 11th General Assembly ng CAMASA.
Samantala, hinikayat ni Father Benito Tuazon, Director ng Bahay Pari ng Arkidiyosesis ng Maynila at dating Caritas Manila scholar, ang mga alumni at Youth Servant Leadership and Education Program o YSLEP scholars na gamitin ang kanilang edukasyon hindi lamang para sa sariling tagumpay kundi para sa kabutihan ng kapwa at pagsunod sa kalooban ng Diyos.
Sa kanyang pagninilay sa Misa para sa 11th General Assembly, ibinahagi ni Father Tuazon ang kanyang karanasan bilang dating scholar ng Caritas Manila.
Ibinahagi ng pari na muntik nang mawala ang kanyang scholarship matapos makatanggap ng mababang grado dahil sa hindi pagkakaunawaan sa isang guro.
Nakiusap noon ang kanyang ina sa scholarship coordinator upang mabigyan siya ng pagkakataong magpatuloy sa pag-aaral.
Ayon kay Father Tuazon, naging mahalagang aral sa kanya ang sakripisyo at pagpapakumbaba ng kanyang ina, na nag-udyok sa kanyang magsikap at tuparin ang pangakong hindi na muling bibiguin ang kanyang pamilya.
Kalaunan, nakapagtapos si Father Tuazon ng kolehiyo at naging computer programmer bago pumasok sa pagpapari, kaya ngayon at patuloy niyang binibigyang diin na “education is an equalizer,” ngunit hindi sapat ang pagkakaroon lamang ng kaalaman.
Sinabi ng Pari na kailangang gawing karunungan ang edukasyon at gamitin ito sa mabuti at alinsunod sa pananampalataya at kalooban ng Diyos.
Tiniyak naman ni Father Pascual na patuloy na palalakasin ng Caritas Manila ang mga programa ng CAMASA at YSLEP upang higit na matulungan ang mga scholars sa kanilang personal at leadership development.
“Having an education is an equalizer. When you’re educated, you can go anywhere, you can be proud, and you can hold your head up high and stand with others because you have attained a certain kind of knowledge. But as we know, education is not enough,” ayon pa sa pagninilay ni Fr.Tuazon sa CAMASA 11th General Assembly.
Hinimok ni Fr.Pascual at Fr.Tuazon ang mga scholar at alumni na isabuhay ang self-discipline, moral integrity at social responsibility, at gamitin ang kanilang natutunan hindi lamang para sa pansariling pag-unlad kundi bilang mga lingkod na makatutulong sa pagbabago at pag-unlad ng lipunan na nakasentro sa Diyos ang paglilingkod.
