14,938 total reads
Hinimok ni Akbayan Party-list Representative Atty. Chel Diokno ang mga Caritas Manila scholars na maging “servant leaders” na inuuna ang kapakanan ng komunidad kaysa pansariling interes.
Sa kanyang keynote address sa 11th General Assembly ng Caritas Manila Alumni Scholars Association o CAMASA, sinabi ni Diokno na hindi dapat maging lider ang isang tao para lamang sa posisyon, spotlight o kapalit na benepisyo dahil mas kailangan ng lipunan ang mga lider na marunong makinig, kumonsulta at gumagawa ng desisyon batay sa kapakanan ng nakararami.
““Ang kailangan na kailangan nating leader ngayon, ‘yung kilala niyo sa tawag na ‘servant leader,’ o sa akin, mas maganda pa nga ang pangalan, ‘transformational leader.’ Dahil ‘yung transformational leader, ‘yan ang nagbabago talaga ng buhay ng kanyang pinaglilingkuran. At ‘yan ang wish ko sa inyo, na lahat ng Caritas Manila scholars ay maging servant leader. Hindi naman kailangan na ‘yung sinasabing great things ang gagawin natin, hindi naman eh. Sa bawat komunidad, basta’t merong leader na tatayo para sa kapakanan ng buong komunidad, hindi niya unahin ‘yung kanyang sariling interes kundi ‘yung kapakanan ng buong mga magkakasama do’n,” ayon sa mensahe ni Diokno para sa CAMASA 11th General Assembly.
Binigyang-diin din ni Diokno na hindi kailangang humawak ng posisyon upang makapaglingkod kaya inihalimbawa niya ang mga ordinaryong mamamayan na nagpasimula ng community pantries noong pandemya, na aniya ay nagpapakita na maaaring magsimula ang tunay na pagbabago kahit pa kakaunti pa lamang ang mga taong handang kumilos para sa iba.
Nanawagan din ang mambabatas sa mga scholars na manindigan laban sa kawalan ng katarungan, korapsyon at pang-aabuso, at ipaglaban ang dignidad at karapatan ng mga higit na nangangailangan.
Iginiit niya na bukod sa kamalayang pambansa o national consciousness, kailangan din ng bansa ang “konsensiyang pambansa” o national conscience upang magkaroon ng tapang na kumilos kapag may nakikitang mali sa lipunan.
“And for me, ‘yung talagang isang napakagandang asal ng isang leader ay kahit na hindi siya ‘yung natatamaan, basta’t meron siyang nakikitang hindi tama, meron siyang nakikitang inhustisya, tatayo, titindig, at ipaglalaban niya ‘yung biktima ng inhustisya. And I hope that all of you today, in the weeks and months and in the years to come, will also learn to fight not only for yourselves, but especially for our brothers and sisters, lalong-lalo na ‘yung dehado sa ating bansa. At ‘yung inuuna natin palagi ang dangal, ang dignidad, ang buhay ng bawat kasama natin.,” bahagi pa ng mensahe ni Diokno para sa CAMASA 11th General Assembly.
Kabilang sa mga binanggit ni Diokno ang pangangailangan para sa anti-political dynasty law at pananagutan sa mga sangkot sa korapsyon kaya sa huli, hinikayat niya ang mga Caritas scholars na gamitin ang kanilang edukasyon at kakayahan upang maging bahagi ng pagbabago at pagtataguyod ng isang mas makatarungan at makataong Pilipinas.
