629 total reads
July 8, 2020-2:31pm
Mapanganib din maging sa mga pari ng simbahang katolika ang isinabatas na Anti-Terrorism Law.
Ito ang inihayag ni Manila Apostolic Bishop Broderick Pabillo, lalu’t kabilang sa mga gawaing ng mga lingcod ng simbahan ang makihalubilo sa iba’t ibang uri ng mga tao, maging iba pa ang kanilang pananampalataya at paniniwala.
Ayon pa sa obispo, karaniwan na rin sa mga pari ang pagtulong lalu sa mga dukha maging sa mga taong pinagkakaitan ng karapatan at biktima ng pang-aabuso.
“Ang problema natin sa mga pari, lalung lalu na sa mga probinsya kasi sila ang puntahan ng mga tao, katutubo, sila ang tumutulong sa mga tao kapag walang pagkain,” ayon sa pahayag ni Bishop Pabillo sa programang Pastoral Visit sa Barangay Simbayanan.
Dagdag pa ni Bishop Pabillo; “Paano kung natulungan nila ang isang pamilya, tapos sasabihin ng military na sila ay terorista, so pati si Father ngayon ay sangkot na. Kasi siya ay tumulong sa mga nangangailangan. Kaya nga maraming mga pari at madre sa probinsya natin ay nagkakaroon ng red tagging. Hindi naman sa sila ay kumikilos sa bundok kundi sila ay tumutulong sa mga tao nangangailangan at dahil dyan sila ay nared-tag sila. So yan po ang problema.”
Sinabi pa ng obispo na may mga programa rin ang simbahan tulad ng ‘sanctuary’ o pagbibigay ng proteksyon sa mga taong naapi at mga testigo na maari ding gamiting paratang sa pagkakanlong ng mga paghihinalaang terorista o lumalaban sa gobyerno.
Kabilang si Bishop Pabillo sa mga opisyal ng simbahan na hayagang tutol sa pagsabatas ng anti-terror bill
Bukod sa obispo, ilan pang mga opisyal ng simbahan at mga institusyon ang nagpahayag ng pagtutol sa minadaling pagsasabatas ng anti-terror law kabilang na dito ang Association of Major Religious Superiors in the Philippines (AMRSP), Philippine Misereor Partnership Inc. (PMPI), CBCP-Nassa at Catholic Educational Association in the Philippines (CEAP).
Naniniwala ang grupo na walang sapat na safety measures ang batas para pangalagaan ang mga inosenteng mamamayan na maaring mapaghinalaang mga terorista o kaanib ng makakaliwang grupo.
Binigyan diin din ng simbahan na hindi rin napapanahon ang pagsasabatas lalu’t nahaharap sa krisis ang bansa mula sa epekto ng patuloy na pagtaas ng bilang ng mga nahahawaan ng novel coronavirus.
Una na ring nagpahayag ng pangamba si Bishop Pabillo na dahil sa anti-terror law at malawakang kagutuman ang maging dahilan pa ng mamamayan na mahikayat na lumahok sa mga grupong laban sa pamahalaan.
