35,983 total views
Ipinapasa-Diyos na lamang ni Ozamis Archbishop Martin S. Jumoad ang babaeng vlogger na lumapastangan sa holy water font ng Saint John the Baptist Parish sa Jimenez, Misamis Occidental na dahilan upang pansamantalang ipasara ang Simbahan dahil sa sacrilege noong ika-5 ng Agosto, 2025.
Ito ang pahayag ng Arsobispo sa Radyo Veritas matapos ang muling pagbubukas sa Simbahan noong ika-16 ng Agosto, 2025 -makaraang maisagawa ng mga mananampalataya sa parokya ang mga naaangkop na Acts of Reparation.
Ipinaliwanag ni Archbishop Jumoad na tanging ang Panginoon lamang ang tunay na nakakakita sa kadalisayan ng puso ng bawat isa at siyang makakaalam kung taos-puso ang pagsisisi nito sa kanyang nagawang kasalanan.
Ibinahagi ng Arsobispo na tanging sa pamamagitan ng kanyang vlog at pagbibigay ng mga panayam humingi ng patawad ang babaeng vlogger sa kanyang ginawang paglapastangan sa Simbahan.
“I think she has done it [apology] through her vlog and siya po ay nagpa-interview, I know that God is more merciful and God also will see our heart that we are really sincere in our repentance of our sins.” Bahagi ng mensahe ni Archbishop Jumoad sa Radyo Veritas.
Makalipas ang 11-araw mula ng ipasara ng Arsobispo ang Simbahan noong ika-5 ng Agosto, 2025 ay nakatuwang ni Archbishop Jumoad sa pagdiriwang ng banal na misa at rito ng pagbubukas at reconsecration sa Simbahan noong ika-16 ng Agosto, 2025 ang mga pari ng Arkidiyosesis ng Ozamis na dinaluhan naman ng mga mananampalataya ng parokya na lubos ang pasasalamat sa muling pagbubukas ng kanilang Simbahan.
Kabilang sa itinakdang acts of reparation bago muling pinahintulutan ang pagbubukas ng Simbahan ang pagsasagawa ng Holy Hour, pangungumpisal ng mga mananampalataya sa parokya, at pagsasagawa ng siyam na araw na Prayer Vigil na nagsimula noong ika-7 ng Agosto, 2025 upang hingin ang awa ng Diyos, ituwid ang kasalanang ginawa laban sa kabanalan ng Simbahan, at ipanalangin ang kagalingan at pagpapanibago matapos ang naganap na paglapastangan sa Simbahan.
Sa muling pagbubukas ng Simbahan ay inatasan ni Archbishop Jumoad si Rev. Fr. Rolly Lagada –ang kura paroko ng Saint John the Baptist Parish sa Jimenez katuwang ang parochial vicar ng Simbahan na si Rev. Fr. Rommel Rudinas na ipagpatuloy ang pagbabahagi ng katesismo sa mga mananamapalataya kaugnay sa pagbibigay galang at pagpapahalaga sa kasagraduhan ng Simbahan at mga sakramento ng Simbahang Katolika.
Ayon kay Archbishop Jumoad, “The Parish priest, Rev. Fr. Rolly Lagada together with his parochial vicar, Rev. Fr. Rommel Rudinas, are hereby instructed to ensure proper catechesis on the respect due to sacred spaces and to promote ongoing spiritual renewal among the parishioners.”
Una ng binigyang diin ng Arsobispo na bahagi ng tungkulin ng mga mananampalataya sa parokya ang protektahan ang Simbahan mula sa mga taong nagnanais na lumapastangan sa kasagraduhan nito.
