30,627 total reads
Humiling ng panalangin si Calapan Bishop Moises Cuevas para sa kapayapaan ng kaluluwa ni Bishop Emeritus Warlito Cajandig, na pumanaw nitong Martes, October 21, 2025, sa Iloilo City, sa edad na 81-taong gulang.
“It is with profound sadness that we announce the death of the Most Rev. Warlito I. Cajandig, Bishop-Emeritus of the Apostolic Vicariate of Calapan,” ayon kay Bishop Cuevas.
Matatandaang na-comatose si Bishop Cajandig noong September 1, 2018 matapos ma-stroke at sumailalim sa brain surgery. Nagsilbi siya bilang pastol ng Apostolic Vicariate of Calapan sa loob ng 33 taon, mula 1989 hanggang 2022.
“May Bishop Cajandig’s witness of missionary love, humble service, and steadfast faith continue to inspire us toward a more faithful and vibrant synodal Church,” dagdag pa ni Bishop Cuevas.
Hinimok din ng obispo ang mga pari ng bikaryato na mag-alay ng banal na misa para sa kapayapaan ng kaluluwa ni Bishop Cajandig.
Si Bishop Cajandig ay tubong Dumarao, Capiz. Inordinahan siyang pari noong 1970 at kabilang sa mga unang pari nang maitayo ang Diocese of Romblon.
Noong 1989, itinalaga siya ni Pope St. John Paul II bilang ikalimang obispo ng Calapan, tungkuling kanyang ginampanan hanggang sa kanyang pagreretiro noong November 2022.
