555 total views
Ikinagalak ni Apostolic Vicariate of Taytay Palawan Bishop Broderick Pabillo ang pagkakaloob ng European Commission (EC) ng humanatarian aid sa Pilipinas at iba pang bansa sa Southeast Asia.
“Tayo po ay natutuwa sa hakbang ng European Commission na magbibigay sila ng Humanatarian Aid at ibang mga bansa na natatamaan ng kalamidad,” ayon sa panayam ng Radio Veritas kay Bishop Pabillo.
Ang humanitarian aid ng EC na aabot sa 21-Million Euros o 1.2-bilyong piso ay pangunahing ilalaan sa pagtulong sa mamayang nasalanta ng kalamidad, nakakaranas ng kahirapan ng dahil sa pag-iral ng sigalot higit na sa bahagi ng Mindanao at disaster preparedness.
Ipinagpapasalamat ng Obispo sa Diyos ang pagtulong ng EC sa mga vulnerable countries higit na sa mga nangangailangang mamamayan.
“This is something that is praise worthy na dapat magtulungan tayo at ang mga bansang mayroon tulad ng European Union ay makakatulong sa mga taong nasasalanta,” ayon pa kay Bishop Pabillo.
Ipinagdarasal ng Obispo na tiyakin ng European Commission na tunay na mapupunta ang tulong sa mga mamamayang labis na nangangailangan.
Ito ay higit na ngayong panahon ng eleksyon kung saan maaring magamit ang humanatarian aid sa mga anomalyang katulad ng korapsyon.
“Alam niyo malaki sana ang impact ng mga aid na ito sa pagtulong kung talagang natutulungan ay mga nangangailangan kaya ay siguraduhin lang ng European Union na ang aid nila ay talagang nakakapunta sa mga nangangailangan kaya sana hindi ma-corrupt ang kanilang tinutulong at hindi magamit sa eleksyon, ngayong dadating na eleksyon na siguraduhin sana nila na maayos ang tumatanggap nito at talagang nakakatulong sa nangangailangan,” pagbabahagi pa ni Bishop Pabillo sa Radio Veritas.
Ayon naman sa pag-uulat ni Janez Lenarčič, ang EC Commissioner for Crisis Management, ilalaan ang sampung milyong euro sa pagtulong sa mga nasalantang mamayan ng Bagyong Odette noong December 2021.
Isa punto limang milyong euro naman ang ilalaan sa pagtulong sa mga pinakanangangailangang komunidad sa bahagi ng Mindanao at ang nalalabing siyam punto limang euro ay para naman sa disaster preparedness response ng mga matutulungang bansa.
