Kinilala at pinasalamatan ng Archdiocese of Manila ang mga guro sa paggunita ng World Teachers Day.
Ayon kay Archbishop Jose Cardinal Advincula,isang bokasyon ang pagiging guro na humuhubog sa bawat kabataan.
“Binabati ko ang lahat ng mga guro sa araw na ito na ginugunita natin ang Teachers’ Day. Ang pagiging guro ay hindi lamang isang profession. Ito ay isang vocation, isang pagtawag mula sa Diyos. Ang pagtuturo at paggabay sa mga estudyante ay hindi lamang trabaho. Ito ay paglilingkod. Salamat sa inyong tapat na pagtugon sa tawag ng paglilingkod,” pahayag ni Cardinal Advincula sa Radio Veritas.
Batid ng arsobispo ang malaking hamong kinakaharap ng mga guro sa kasalukuyang panahon ng pandemya kung saan ipinatupad ang online at blended learning sa mga kabataan.
Pawang balakid sa mga guro at estudyante ang kakulangan ng kagamitan para sa makabagong paraan ng pagtuturo tulad na lamang ng internet partikular sa mga liblib na lugar.
Hinanay din ang mga guro sa mga service frontliners ng bansa na patuloy sa paglilingkod sa kabila ng mapanganib na sitwasyon ng COVID-19 pandemic.
“Nararapat kayong parangalan dahil kayo din ay mga frontliners at bayani sa panahong ito ng pandemya,” ani ng Cardinal.
Hamon ni Cardinal Advincula sa mamamayan na maging guro sa kapwa sapagkat ang mga bata at nakatatanda ay may matutuhan sa kani-kanilang karanasan.
“Sa pamamagitan ng ating mabuting halimbawa at pagsaksi, turuan at gabayan natin ang bawat isa sa maka-Diyos at matuwid na pamumuhay, mabuting pag-uugali at pakikipagkapwa-tao,” dagdag pa ni Cardinal Advincula.
Tuwing October 5 ginugunita ang World Teachers’ Day kung saan ngayong taon ay nakatuon ito sa temang ‘Teachers at the heart of education recovery’ dahil na rin sa pangangailangan ng mga guro ngayong panahon ng pandemya.
Sa Pilipinas inaasahang sisimulan sa lalong madaling panahon ang pilot testing ng limited face-to-face classes sa 120 paaralan sa bansa kasunod ng pag-apuba ni Pangulong Rodrigo Duterte sa hakbang noong Agosto.
Dalangin ni Cardinal Advincula ang kaligtasan at kalakasan ng bawat guro na nagsasakripisyo para lingin ang kakayahan at kaalaman ng bawat bata sa bansa.
