56,594 total views
Mariing kinondena ng Catholic Bishops’ Conference of the Philippines (CBCP) ang karahasang nangyari sa Barangay Dalapitan, Matalam, North Cotabato na ikinasugat ng 22 katao matapos hagisan ng granada ang mga residenteng nagsasaya sa pagsalubong ng Bagong Taon.
Ayon kay Kidapawan Bishop Jose Colin Bagaforo, chairman ng Episcopal Commission on Interreligious Dialogue ng CBCP, walang puwang sa lipunan ang anumang uri ng karahasan at dapat papanagutin sa batas ang mga nasa likod ng krimen.
“We strongly condemn this very serious crime against our peace-loving people of Cotabato Province. In solidarity with our government leaders, we condemn this very serious crime,” pahayag ni Bishop Bagaforo sa Radyo Veritas.
Batay sa ulat ng Philippine National Police–North Cotabato, isang riding-in-tandem ang naghagis ng granada sa mga residente bandang hatinggabi ng January 1 habang nagdiriwang ng Bagong Taon, dahilan upang masugatan ang 22 katao.
Nanawagan ang obispo sa mga mamamayan na manatiling alerto ngunit huwag hayaang sirain ng insidente ang pagbubuklod at mapayapang ugnayan ng komunidad sa kabila ng pagkakaiba ng paniniwala.
“Maging mapagbantay, pero huwag hayaang hadlangan ng insidenteng ito ang ating diwa ng pagkakapatiran at pakikipagkapwa,” ani Bishop Bagaforo.
Hinikayat din nito ang publiko na makipagtulungan sa mga awtoridad upang matukoy at madakip ang mga responsable sa krimen.
“We ask our people to support and cooperate with our authorities in apprehending those responsible for this,” dagdag ng obispo.
Samantala, kinumpirma ng PNP na sa isinagawang province-wide manhunt ay napaslang ang isa sa mga suspek matapos manlaban sa pulisya.
Kinilala ang suspek na si Hammad Ansa, na ayon sa mga saksi ay positibong natukoy sa police gallery bilang isa sa riding-in-tandem at may nakabinbing warrant of arrest sa kasong pagpatay noong December 1.
Ayon sa paunang imbestigasyon ng pulisya, hinihinalang may kaugnayan sa paghihiganti ang insidente kasunod ng pinaigting na operasyon laban sa ilegal na droga sa Matalam, kung saan itinuturing ang ilang lugar bilang pinamumugaran ng drug syndicates.
Patuloy namang ipinapanalangin ni Bishop Bagaforo at ng Simbahang Katolika ang paggaling ng mga biktima at ang patuloy na pagbubuklod ng pamayanan tungo sa makatarungan at tunay na kapayapaan.
